Astanada konkı sportynan Álem kýbogynyń kezeńi ótedi
ASTANA. 26 qazan. QazAqparat /Gúlmıra Alıakparova/ - Ústimizdegi jylǵy 25-27 qarasha kúnderi Astanadaǵy «Alaý» muz saraıynda konkı sportynan Álem kýbogynyń ІІ kezeńi ótedi.
Qazaqstan Essent ISU konkımen júgirý sporty boıynsha Álem kýbogynyń kezeńin ótkizý quqyǵyna alǵash ıe boldy. Jarysqa 30-dan astam eldiń eń myqty degen konkıshileri qatysady. Olar - Álem jáne Eýropa chempıondary, Olımpıdalyq oıyndardyń jeńimpazdary men júldegerleri, álem rekordshylary: Ivan Skobrev, Sven Kramer, Enrıko Fabrıs, Havard Boko, Martına Sablıkova, Iren Vıýst, Shtefenı Bekkert, Ekaterına Lobysheva jáne taǵy basqalar.
«Alaý» muz saraıynda aıdyndy jarysqa ázirleý sapasyn jáne Kýbokqa álemniń úzdik konkıshileri qatysatyndyǵyn eskere kele mamandar, atalmysh jarys barysynda jańa jetistikter jáne rekordtar bolatyndyǵyn boljaýda. Kýbokty Kanada, AQSh jáne Eýropa elderiniń arnalary boıynsha tikeleı taratý josparlanýda.
«Álem Kýbogyn oıdaǵydaı ótkizý osy sport túri boıynsha halyqaralyq odaqpen yqpaldastyqty odan ári damytýǵa septigin tıgizip, 2014 jyly Álem chempıonatyn Astanada ótkizý quqyǵyna talasýǵa múmkindik beredi. Árıne, Álem kýbogy Qazaqstanda konkı sportyn damytýǵa jáne tanymal etýge oń yqpalyn tıgizedi», - delingen «Alaý» muz saraıynyń baspasóz qyzmeti taratqan habarlamada.
