Astanada kómir tehnologııasy ulttyq ǵylymı ortalyǵy ashylýy múmkin

ASTANA. KAZINFORM – Qazaqstanda kómir tehnologııasy boıynsha ulttyq ǵylymı taldaý ortalyǵyn ashý josparda bar. Bul týraly Ónerkásip jáne qurylys mınıstrligi Ónerkásip komıtetiniń kómir ónerkásibi basqarmasynyń basshysy Janat Igisinov málim etti.

- Elde kómir men kómir qaldyqtaryn qaıta óńdeýge mamandanǵan ǵylymı ortalyq qurý bastamasy kóterildi. Ortalyq zamanaýı qural-jabdyqpen jabdyqtalyp, memleket tarapynan qarjylandyrylady. Maqsat – «taza» kómir tehnologııalaryn damytý, - dedi Janat Igisinov elordada ótken VI kómir ónerkásibi forýmynda.

Mınıstrlik ókiliniń aıtýynsha, ulttyq ortalyqty elordada qurý josparlanyp otyr.

- Astanada ulttyq analıtıkalyq ortalyq ashý – ázirge jospar, usynys aıtqaly otyrmyz. Ulttyq jol kartasyn ázirleımiz, memlekettik baǵdarlama daıyndaımyz. Qazirgi qoldanystaǵy jáne bolashaqta qabyldanýy tıis normatıvtik-quqyqtyq aktiler boıynsha da jumys júrgiziledi. Ulttyq jol kartasy aıasynda zań jobasyn ázirleý qarastyrylǵan, - deıdi ol.

Buǵan deıin Ónerkásip jáne qurylys mınıstrliginiń ókili elimizde kómirdi zańsyz satatyn deldaldarmen kúres jolyn ataǵan edi. 

Aıta keteıik, búgin Astanada VI kómir ónerkásibi forýmy ótti.

Búginde elimizde 33 mlrd 600 mln tonna kómir qory bar. Qazaqstan kómir qory boıynsha álemde alǵashqy 10 eldiń qataryna kiredi.