Astanada kompozıtor Erkeǵalı Rahmadıevtiń shyǵarmashylyǵyna arnalǵan kontsert ótedi
ASTANA. 7 aqpan. QazAqparat - Búgin L.N.Gýmılev atyndaǵy Eýrazııa ulttyq ýnıversıtetiniń «Káýsar» mádenı-tanymdyq birlestiginiń uıymdastyrýymen Qazaqstannyń Eńbek eri, Memlekettik syılyqtyń laýreaty,
KSRO jáne Qazaqstannyń Halyq ártisi, kompozıtor, Erkeǵalı Rahmadıevtiń qatysýymen «Óner asqarynda» atty kontsert ótedi. Saltanatty keshte, kontsertmeıster Elena Sahnonyń súıemeldeýimen QR eńbek sińirgen ártisi Ǵalııa Baıǵazınovanyń, QR eńbek sińirgen qaıratkeri Azamat Jyltyrkózovtyń, Súndet Baıǵozınniń, halyqaralyq baıqaýlardyń laýreattary Roza Núrkeı men Beıimbet Tańaryqovtyń oryndaýynda avtordyń arııa jáne án romanstary oryndalady.
Qazaqstan Respýblıkasynyń Memlekettik syılyǵynyń ıegeri Erkeǵalı Rahmadıev shyǵarmashylyǵy qazaqtyń halyq mýzykasynyń baı murasyn boıyna sińirip sımfonııalyq, operalyq, vokaldy-aspaptyq, kameralyq shyǵarmalary ulttyq ónerdiń kásibı óresin keńeıtip, onyń janrlyq salalaryn damytty. Sazgerdiń "Meıram kúıi" sımfonııalyq poemasy 1973 jyly Almatyda ótken Azııa elderiniń halyqaralyq mýzyka jıynynda dúnıejúzilik efırge joldama alyp, birinshi júldege ıe boldy. "Qudasha-dýman" men "Meıram kúni" degen shyǵarmalary sımfonııalyq orkestrdiń oryndaýynda 1973 jyldary London, Fıladelfııa elderinde shyrqalsa, 1974 jyly Bratıslavada, 1975 jyly Pragada jáne taǵy basqa qalalarda oryndaldy. Ulttyq mýzyka mádenıetiniń marjandaryn klassıkalyq shyǵarmamen toǵystyrǵan romanstar, operalar men basqa da shyǵarmalar elimizdiń ulttyq murasynyń altyn qoryna enip otyr. Qazaqtyń opera jáne balet teatrynda "Qamar sulý", "Alpamys", "Abylaı han" operalary qoıylǵan.
