Astanada kompanııa qyzmetkerleriniń biliktiligin arttyrýǵa arnalǵan II Halyqaralyq kórme-konferentsııa ótti
ASTANA. 24 mamyr. QazAqparat - 2013 jyldyń 22-23 mamyrynda Astanadaǵy «Kórme» ortalyǵynda qysqa merzimdi oqytýǵa arnalǵan "KazTraining&Consulting-2013: Basqarý. Motıvatsııa. Baǵalaý" II Halyqaralyq kórme-konferentsııasy ótti.
Іs-sharanyń uıymdastyrýshysy QR Bilim jáne ǵylym, Qorshaǵan ortany qorǵaý, Mádenıet jáne aqparat mınıstrlikteriniń, sondaı-aq QR Saýda-ónerkásip palatasynyń, QR Joba menedjerleriniń odaǵy men Qazaqstannyń «QAZKA» Kásipkerler qaýymdastyǵynyń qoldaý kórsetýimen «ExpoDesignGroup» kórme kompanııasy bolyp tabylady.
II Halyqaralyq «KazTraining&Consulting-2013» kórme-konferentsııasynyń jumysyna Qazaqstannyń túrli qalalarynan, TMD elderinen jáne shetelden 60-tan astam uıym, sondaı-aq halyqaralyq ataqqa ıe 45-ten astam kásipqoı spıker men bıznes-jattyqtyrýshy qatysty.
Kórmege iri holdıngtik kompanııalar, bankter, shaǵyn jáne orta bıznes, memlekettik ulttyq kompanııalardyń ókilderi, HR-bólimderiniń basshylary, sarapshylar men bıznes-jattyqtyrýshylar shaqyryldy. Eki kún aralyǵynda olar qysqa merzimdi oqytýdyń jańa ádistemeleri men naryqtaǵy qyzmetterdiń san alýan túrlerimen tanysýǵa múmkindik aldy. Konsaltıngtik jáne trenıngtik kompanııalar, halyqaralyq jáne jergilikti oqytý ortalyqtary, biliktilikti arttyrý ortalyqtary, rekrýtıngtik agenttikter, psıhologııalyq jáne til ortalyqtary óz qyzmetteriniń keń toptamasyn usyndy, sondaı-aq,bilim granttary men iskerlik týrızm qyzmetin usynatyn uıymdar oqytýdaǵy tehnologııalar men qural-jabdyqtarmen tanystyrdy.
Konferentsııanyń iskerlik baǵdarlamasy mazmundy ótti. Qazaqstan, Reseı jáne sheteldiń jetekshi spıkerleri oqytý jáne adamı qorlardy basqarýǵa qatysty 80-ge jýyq sheberlik synybyn, trenıng, bıznes oıyn, tanystyrylym men semınardy ótkizdi.
Qyzmetkerlerdi damytý - kez kelgen uıymnyń tabysqa jetýiniń mańyzdy sharttarynyń biri. Bul, ásirese, ǵylymı-tehnıkalyq progrestiń shapshańdaýyna baılanysty kásibı bilimder men daǵdylar tez eskiretin bizdiń zamanymyzda asa kókeıtesti másele. Qyzmetker biliktiliginiń kompanııa qajettilikterine sáıkes kelmeýi onyń qyzmetiniń nátıjelerine keri áser etedi. Sondyqtan kompanııanyń damýy úshin onyń basty áleýetin - qyzmetkerlerdi damytý qajet. Qyzmetkerlerdi oqytý jáne damytý júıesi olardyń kásibı sheberligin arttyryp, boıynda zamanǵa saı ekonomıkalyq oılaý men topta jumys jasaı bilýdi qalyptastyrady. Oqytý men damytý úrdisteriniń arqasynda eńbek ónimdiligi jáne jalpy kásiporynnyń tıimdi qyzmet etýi arta túsedi.
