Astanada kommýnaldyq tarıf máseleleri boıynsha qoǵamdyq qabyldaý ótti
«Búgingi qoǵamdyq qabyldaýǵa tabıǵı monopolııa boıynsha barlyq jaýapty mekemeler qatysyp otyr. Turǵyndardyń sý, jylý, jaryq jáne basqa da kommýnaldyq máselelerge qatysty suraqtaryna jaýapty múmkindiginshe osy jerde beremiz. Eger qandaı da bir keńinen qaraıtyn problema bolsa, onda ótinish qaldyrady. Al biz ótinish negizinde qajetti sharalardy qolǵa alamyz. Atalǵan sharany qarasha boıy, ár sársenbi kúnderi ótkizemiz. Bul týraly halyq arasynda keńinen taratýdamyz. Qoǵamdyq qabyldaýǵa 40-qa jýyq turǵyn ártúrli suraqtarmen keldi, onyń 30-dan astamynyń máselesi osy jerde sheshildi», - dedi Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń Astana qalasy boıynsha departamentiniń basshysy Bolat Tanabergenov.
Onyń aıtýynsha, elorda turǵyndary kóbinese jaryq baǵasy jáne sýdyń qunyn esepteýish qurylǵylar boıynsha shaǵymdanýda.
Qoǵamdyq qabyldaý jumysyna, tabıǵı monopolııalardy retteý boıynsha jaýapty uıymdar, «Astana- Teplotranzıt» AQ, «Astanaenergosbyt» AQ, «Astana qalalyq ortalyq gazben jabdyqtaý» JShS, «Astana - REK» AQ, «Astana sý arnasy» QKM qatysty. Uıymdastyrýshylardyń aıtýynsha, árbir turǵyn tutynýshy retinde óz quqyqtary jáne ózge de saladaǵy máselelerdi sheshý joldary boıynsha túsinikteme ala alady.
Sonymen qatar, tutynýshylardyń quqyqtaryn qorǵaý departamentiniń basshysy elordada jylý men jaryq baǵasynyń arzandaýyna da qatysty túsinik berdi.
«Ústimizdegi jyldyń jazynan bastap qalalyq prokýratýra «Astana-Energııa» AQ, «Astana-REK» AQ, «Astana-Teplotranzıt» AQ, «Astanaenergosbyt» JShS jáne tıisinshe bizdiń mekemege de tekserý jumystaryn júrgizdi. Nátıjesinde joǵaryda atalǵan mekemelerdiń baǵany negizsiz kótergeni anyqtaldy. Jyl sońyna deıin ústeme baǵamen tólegen tutynýshylarǵa ótemaqy esebinde aqshalary qaıtarylatyn bolady», - dedi ol.
Aıta ketsek, buǵan deıin habarlaǵanymyzdaı elordalyq birqatar monopolııalyq kompanııalarǵa Astana qalalyq prokýratýrasy tekserý júrgizý barysynda «Astana-Energııa» AQ, «Astana-REK» AQ jáne «Astana-Teplotranzıt» AQ, «Astanaenergosbyt» JShS kompanııalarynyń tabıǵı monopolııalar salasynda birqatar zańnamany buzǵany, sondaı-aq, bıýdjet qarjysyn jónsiz paıdalanyp, ınvestıtsııalyq baǵdarlamalardy oryndamaǵanyn anyqtaǵan bolatyn.
Eske sala ketelik, qoǵamdyq qabyldaý 21-28 qarasha kúnderi, saǵat 15:00 men 18:00 aralyǵynda, Astana qalasy, Táshenov kóshesi, 25-úıdiń 2-qabatynda ótedi. Atalǵan departament uıymdastyratyn qoǵamdyq qabyldaýǵa tutynýshylarmen qatar basqa da múddeli tulǵalar qatysa alady.
