Astanada kommýnaldyq qyzmetter aýa raıyna baılanysty kúsheıtilgen rejımge kóshti
ASTANA. KAZINFORM — Elordanyń kommýnaldyq qyzmetteri kúsheıtilgen rejımde jumys júrgizip jatyr. Bul týraly Astana qalasy ákimdigi habarlady.
Qys mezgili bastalǵaly beri elordanyń kommýnaldyq qyzmetteri kúsheıtilgen, táýlik boıǵy rejımde jumys istep keledi. Sońǵy táýlikte Astanada jańbyr túrinde mol jaýyn-shashyn jaýyp, aýa raıynyń ózgerýine baılanysty joldar men trotýarlarǵa muz qatyp, kóktaıǵaq paıda boldy.
Aýa raıyna baılanysty kúndiz aýa temperatýrasy nólden joǵary bolyp, qar erise, túnde kúrt sýytady. Sonyń saldarynan joldar men jaıaý júrginshiler aımaqtarynda muz qatady.
— Qala turǵyndarynyń qaýipsiz júrýin qamtamasyz etý maqsatynda joldarǵa, trotýarlar men kóshelerge tehnıkalyq tuz sebilip jatyr. Qys maýsymy bastalǵaly beri kóktaıǵaqqa qarsy shamamen 3,5 myń tonnaǵa jýyq materıal paıdalanylyp, 1,4 mıllıon tekshe metrge jýyq qar shyǵaryldy. Bul — 104 882 aýyr júk kóliginiń reısine teń. Atalǵan jumys táýlik boıy júrgizilip jatyr, delingen ákimdik habarlamasynda.
31 jeltoqsanǵa qaraǵan túni qar kúreý jumysyna 400-den astam jol jumysshysy men 1100-den asa arnaıy tehnıka jumyldyryldy.
— Sonymen qatar, aýlalardaǵy tártip pen qaýipsizdikke PIK pen MIB jaýapty ekenin eske salamyz. Olar turǵyndardyń qolaılylyǵy men qaýipsizdigi úshin aýla aýmaqtaryn qar men muzdan ýaqytyly tazalaýǵa mindetti.
Astana qalasynyń ákimdigi turǵyndar men qala qonaqtaryn qaýipsizdik talaptaryn saqtaýǵa, joldar men trotýarlarda barynsha saq bolýǵa shaqyrady, sondaı-aq qolaısyz aýa raıy kezinde alys jolǵa shyqpaýdy usynady, — delingen habarlamada.
Aıta ketelik Astanada kóktaıǵaq saldarynan 100-den astam jol-kólik oqıǵasy bolǵan.