Astanada kómir baǵasy sharyqtamaıdy - ákimdik
ASTANA. QazAqparat - Astana qalasynyń kásipkerlik jáne ónerkásip basqarmasynyń bólim basshysy Azamat Rashıtov elordada kómir baǵasy nelikten qymbattaǵanyn túsindirdi, dep habarlaıdy «QazAqparat»HAA tilshisi.
«Ózderińiz biletindeı, birinshiden janar-jaǵarmaı qymbattady. Bul bir. Ekinshiden, «Qazaqstan temir joly» tarıfti 25 paıyzǵa ósirdi. Sáıkesinshe, bul faktorlardyń barlyǵy bıznes ókilderi úshin naryqqa beıimdelýge ıtermeleıdi. Ózińiz biletindeı, bizde qazirgi ýaqytta naryqty ekonomıka. Ákimdik óz tarapynan ekonomıkaǵa negizsiz aralasa almaıdy. Biz bul jaǵdaıdy bilemiz. Qalaǵa Shubarkólden ǵana emes, Maıkóbe, Qarajyra, Bogatyr ken oryndarynan kómir ákelinip jatyr. Qazirgi ýaqytta kómirdiń bir tonnasy 7 myńnan 15 myń teńge aralyǵynda bolyp otyr. Apta buryn ǵana kómir ákelýshilerdiń barlyǵymen bul suraq talqylanǵan. Biraq kómir baǵasy aıtarlyqtaı aspandap ketpeıdi. Baǵany turaqty ustaý maqsatynda iri kómir ken oryndarymen kelisimsharttar jasaldy», - dedi Azamat Rashıtov.
Bólim basshysynyń aıtýynsha, ártúrli ken oryndaryndaǵy kómirlerdiń baǵasy sapasyna qaraı ártúrli bolady. Máselen, Shubarkól men Qarajyranyń kómirin salystyrýǵa kelmeıdi. Sebebi, Shubarkól óniminiń sapasy joǵary.
«Kásipkerler belgileıtin baǵa joǵaryda kórsetilgen somanyń tóńireginde bolady. Biz aldyn ala taldaý júrgizip, Astanada kómir satatyn 20 shaqty kásiporynnyń baryn anyqtadyq. Byltyr sýyq kenetten túsken kezde azdaǵan shý bolǵan edi. Bıyl kómir satýshy kompanııalarmen sóıleskende adamdardyń kóbi shilde aıynan bastap aldyn ala kómir satyp alǵanyn aıtty. Sýyq túskennen keıin sáıkesinshe satýshylar da baǵany azdap kóterdi», - dep túıdi Rashıtov.
Foto: 7kun.kz
