Astanada «Qoljetimdi baspana-2020» memlekettik baǵdarlamasyna qatysý sharttary túsindirildi
Qujattardy qabyldaý qalaı júrgiziletini, bul baǵyt boıynsha azamattardyń qaı sanaty qatysatyny týraly Astana qalasy Turǵyn úı basqarmasynyń basshysy Rýslan Ahmetov aıtyp berdi, dep habarlady http://astana.gov.kz .
«Samuryq-Qazyna» Jyljymaıtyn múlik qory» AQ-ǵa «Shyǵys» turǵyn úı kesheninde salynatyn 678 páterdiń tizimi jiberildi. Qatysýshylardy irikteý kezek boıynsha júrgiziledi, ıaǵnı, jergilikti atqarýshy organda kommýnaldyq turǵyn úı qorynan baspana alýǵa kezekte turǵan azamattar qujattaryn tapsyra alady. Atap aıtqanda, áleýmettik osal toptar, memlekettik qyzmetshiler, bıýdjettik uıym qyzmetkerleri. Turǵyn úı satyp alý baǵdarlamasyna UOS ardagerleri men múgedekteri, jalǵyz baspanasy apatty bolyp tanylǵandar qatyspaıdy», - dedi ol.
Rýslan Ahmetovtyń aıtýynsha, páterlerdi úlestirý eki baǵyt boıynsha júrgiziledi.
1. Satyp alý quqyǵymen jalǵa alý (169 páter). Baspana 15 jyl merzimge jalǵa beriledi. Odan ári satyp alǵan kezde aı saıyn tólengen jalǵa alý aqysy páterdiń jalpy somasynan shegeriledi. Baǵdarlama shartyna sáıkes, azamattar aldymen ózderiniń tóleý qabilettiligin tekserýi qajet. Osy maqsatta «Samuryq-Qazyna» Jyljymaıtyn múlik qory» AQ saıtynda arnaıy kalkýlıator jasaldy, onyń kómegimen baspananyń aı saıynǵy jalǵa alý aqysynyń tóleı alatyn eń kóp mólsherin anyqtaı alady.
2. Tikeleı satý (509 páter). Turǵyn úıdiń 1 sharshy m quny - 180 myń teńgeni quraıdy.
«Qujattar «Jastar» saraıynda (Respýblıka dańǵyly, 34) qabyldanady. Qatysýshylardy irikteý barysynda qujattardyń qaı kezde tapsyrylǵany eskerilmeıdi. Birinshi kúni me, álde sońǵy kúni me, báribir. Páterlerdi úlestirý birinshi kezekte, Astananyń kommýnaldyq turǵyn úı qorynan baspana alýǵa muqtaj azamattardyń tizimine esepke alynǵan kúnge baılanysty júrgiziledi. Mysaly, kezekte 2008 jyldan beri tursa, ol 2012 jyly kezekke qoıylǵan adamnan erte baspanaly bolady», - dedi Rýslan Ahmetov.
«Samuryq-Qazyna» Jyljymaıtyn múlik qory» AQ turǵyn úı» baǵyty boıynsha memlekettik baǵdarlamalarǵa qatysýshylar jyl sońyna deıin qonys toıyn toılaıdy dep kútilýde.
