Astanada «Qoljetimdi baspana-2020» baǵdarlamasy boıynsha qujattar qabyldaý bastaldy
Astana qalasy Turǵyn úı basqarmasynyń basshysy Ashat Eleýjanov qala turǵyndarynyń resmı taratylǵan aqparatty durys túsinbeı, bosqa dúrlikkenin, bári túsindirilgen soń jaǵdaıdyń turaqtanǵanyn aıtty. «Buqaralyq aqparat quraldarynda, ınternet-resýrstarda, teledıdarda qujattardy qabyldaý 13-25 qazan aralyǵynda júrgiziletini týraly aqparat jarııalandy . Qujattardy tek kezekte turǵan azamattar ǵana tapsyrýy tıis ekeni de aıtyldy. Aqparattyń adamnan adamǵa tez taraıtynyn eskersek, bul shynaıy aqparat kózi emes. Nátıjesinde qujattardy tapsyrýǵa baspana alýǵa kezekte turǵan azamattar da, kezekke turmaǵan azamattar da kelip otyr», - dedi A.Eleýjanov.
Sonymen qatar basqarma basshysy ótinish berý merzimi páterlerdi úlestirýge áser etpeıtinin atap ótti. Ol baspana alýǵa muqtaj azamattardyń kezegi men ótinish berýshiniń tólem qabiletiniń rastalý nátıjesi boıynsha júrgiziledi. Qazirgi ýaqytta «Qoljetimdi baspana-2020» baǵdarlamasyn 4 operator júzege asyrady: jergilikti atqarý organdary, «Qazaqstannyń ıpotekalyq kompanııasy» AQ, «Samuryq-Qazyna» jyljymaıtyn múlik qory» AQ jáne «Qazaqstannyń Turǵyn úı-qurylys jınaq banki» AQ. Esterińizge sala keteıik, baǵdarlamanyń bul baǵyty boıynsha Astana qalasynyń kommýnaldyq turǵyn úı qorynan baspana alýǵa kezekte turǵan memlekettik qyzmetshiler, bıýdjettik uıymdardyń qyzmetkerleri, áskerı qyzmetshiler, ǵaryshkerlikke kandıdattar, ǵaryshkerler, arnaýly memlekettik organ qyzmetkerleri jáne memlekettik saılanbaly qyzmet atqaratyn adamdar; áleýmettik jaǵynan álsiz toptarǵa jatatyn adamdar (Uly Otan soǵysynyń múgedekteri men qatysýshylaryna teńestirilgen adamdar; 1 jáne 2 toptaǵy múgedekter; múgedek balalary bar nemese olardy tárbıeleýshi otbasylary; Qazaqstan Respýblıkasynyń Úkimeti bekitetin aýrýlar tiziminde atalǵan keıbir sozylmaly aýrýlardyń aýyr túrlerimen aýyratyn adamdar; jasyna qaraı zeınet demalysyna shyqqan zeınetkerler; kámeletke tolǵanǵa deıin ata-analarynan aıyrylǵan jıyrma toǵyz jasqa tolmaǵan jetim balalar men ata-anasynyń qamqorlyǵynsyz qalǵan balalar; oralmandar; ekologııalyq zilzalalar, tabıǵı jáne tehnogendi sıpattaǵy tótenshe jaǵdaılar saldarynan turǵyn úıinen aıyrylǵan adamdar; kóp balaly otbasylar; memlekettik nemese qoǵamdyq mindetterin, áskerı qyzmetin oryndaý kezinde, ǵarysh keńistigine ushýdy daıyndaý nemese júzege asyrý kezinde, adam ómirin qutqarý kezinde, quqyq tártibin qorǵaý kezinde qaza tapqan (qaıtys bolǵan) adamdardyń otbasylary; tolyq emes otbasylar) qatysa alady. Baǵdarlamanyń bul baǵyty boıynsha Astana qalasynyń kommýnaldyq turǵyn úı qorynan baspana alýǵa kezekte turǵan Uly Otan soǵysynyń múgedekteri men qatysýshylary, jalǵyz turǵyn úıi Qazaqstan Respýblıkasynyń zańnamasynda belgilengen tártippen avarııalyq jaǵdaıda dep tanylǵan Qazaqstan Respýblıkasynyń azamattary qatysa almaıdy. Qujattardy qabyldaý «Jastar» saraıynda 13-25 qazan aralyǵynda júrgiziledi. Astana qalasy boıynsha «Qoljetimdi baspana-2020» baǵdarlamasyna «Samuryq-Qazyna» jyljymaıtyn múlik qory» AQ turǵyn úı» baǵyty boıynsha qatysý týraly tolyq aqparatpen myna jerde tanysýǵa bolady: http://astana.gov.kz/kk/modules/material/6350.
