Astanada qolóner sheberleriniń týyndylary qoıylǵan festıval ótip jatyr
«Jastar» saraıynda elimizdiń eń úzdik qolóner sheberleriniń týyndylary qoıylǵan «Has sheberler» festıvali uıymdastyryldy, dep habarlaıdy Kazinform elorda ákimdiginiń resmı saıtyna silteme jasap.
Іs-shara Astana qalasy ákimdiginiń qoldaýymen ótkizilip jatyr. Has sheberlerdiń qolynan shyqqan jasyl tý elimizdiń eń myqtylary ǵana enetin KInES rekordtar kitabyna jazylmaq.
Festıvaldiń ashylýyna Astana qalasy ákiminiń orynbasary Eset Baıken qatysyp, tilekterin bildirdi, sol sııaqty elimizdiń túkpir-túkpirinen jınalǵan sheberler bas qosty.
El tarıhynda buryn-sońdy bolmaǵan, júzdegen eń úzdik qolóner sheberleriniń qolymen tigilgen jasyl tústi týdyń ataýy – «Birlik, Bereke, Meıirimdilik» dep atalady. Ol – tabıǵatqa, bolashaqqa talpynýdy bildiredi.
«Bul festıval – qolóner sheberleriniń kópten kútken eńbeginiń nátıjesi, kúni-túni jasaǵan jumysynyń jemisi. Sebebi, birazdan beri osy is-sharany ótkizýge muqııat daıyndaldyq, osy aýqymdy festıval bıyl birinshi ret ótkizilip otyr. Jalpy buǵan deıin 2019 jyly Astanadaǵy Baıqońyr aýdanynyń ákimdigimen qolónershiler is-sharasy alǵash ret uıymdastyrylǵan. Maqsaty – kreatıvti ındýstrııany damytý, otandyq ónimdi qoldaý, bolashaqqa qolóner buıymdaryn, sheberlik sabaqtaryn nasıhattaý. Mańyzdy is-sharaǵa elimizdiń túkpir-túkpirinen 300-ge jýyq naǵyz óz isiniń sheberleri keldi. Festıvalǵa úlkender jaǵy ǵana emes, qolynan is keletin jastar, jasóspirimder de qatysýda. Sondaı-aq sheberlerdiń qolynan shyqqan jasyl tústi týdy Qazaqstannyń rekordtar kitaby KInES-ke engizilgeli otyr», – dedi Qazaqstannyń «Has sheberler» otandyq ónimderdi damytý qaýymdastyǵynyń tóraǵasy, festıvaldi uıymdastyrýshylardyń biri Zıýar Jumanova.
Elimizdiń barlyq óńirinen kelgen sheberlerdiń Astanadaǵy tamasha kórmesi, sán-fashion janryndaǵy kórkem dúnıeler kórgen jandy tánti etti. Ásirese, Abaı, Túrkistan, Qyzylorda, Jambyl, Batys Qazaqstan, Atyraý, Mańǵystaý, Aqtóbe, Aqmola, taǵy basqa óńirlerden kelgen has sheberler qolymen jasaǵan týyndylaryn kópshilikke usyndy.
Ónimderdi júnnen toqyǵan áýlettiń úshinshi urpaǵymyz degen Gúlnár sheberdiń qolynan shyqqan dúnıeler aıryqsha áser qaldyrǵany ras.
«Men jasymnan kıiz úıdiń ishinde, kıizdiń ústinde óstim. Aqmola oblysynyń aýylyndaǵy balalyǵym attyń ústinde, jún toqyp, kıiz basýmen ótti. Ákem tiginshi boldy, týysqandarym shetinen ónerli, sýretshi, ismer boldy. Men horeografııa mamandyǵyn bitirsem de, qazir osy ata kásipti jalǵastyrýdy maqsat ettim deıdi», – ol.
Festıvaldiń sońǵy kúninde 19 jeltoqsanda qolónershiler Qyzyl kilemmen júrip ótip, has sheberler sherýin kórsetedi, sóıtip, elimizdiń KInES rekordtar kitabyna enedi.
