Astanada qolóner sheberleriniń ortalyǵyn ashý usynyldy

NUR-SULTAN. QazAqparat – Nur-Sultan qalasynda qolóner sheberleriniń ortalyǵyn ashý usynyldy, dep habarlaıdy QazAqparat.

Qolóner sheberlerin bir alańda shoǵyrlandyrý arqyly elordada týrısterdi tartatyn ortalyq qurylady ári qosymsha jumys oryndary ashylady. Osy jáne basqa da usynystardy kásipkerler Nur-Sultan qalasy Kásipkerler palatasynyń Óńirlik keńesinde aıtty. Іs-sharaǵa astana ákimi Altaı Kólginov jáne Óńirlik keńes tóraǵasy Erlan Súleımenov qatysty.

«Búginde Nur-Sultan qalasy sáni men saltanaty jarasqan týrıstik brendti qalyptastyrýda áleýeti joǵary. Óńirde kádesyı buıymdary óndirisiniń bolýy jáne qolóner jármeńkeleriniń ótýi týrızm salasynyń damýyna oń yqpal etti. Qazirgi kezde Nur-Sultan qalasynda elorda mártebesine saı keletin qolóner sheberleriniń biryńǵaı ortalyǵy joq, qala kóshelerinde, kópshilik jınalatyn oryndar men saıabaqtarda shetelde jasalǵan kádesyılar satylady. Elorda jáne kórshi jatqan óńirlerdegi sheberlerdiń basyn qosatyn qolóner sheberleri ortalyǵyn ashýdy usynamyz. Ortalyq otandyq sheberler óndiretin ónim sapasyn arttyrýǵa yqpal etedi jáne týrısterdi tartatyn taǵy ásem orynǵa aınalady», – dedi Іsker áıelder keńesiniń tóraıymy, Nur-Sultan qalasy Kásipkerler palatasy Óńirlik keńesiniń múshesi Baǵıla Bısembaeva