Astanada kolledj stýdentteri arasynda konkýrs bastaldy
ASTANA. QazAqparat - Astanada tehnıkalyq jáne kásiptik bilim berý mekemeleriniń stýdentteri arasynda ozyq ıdeıalar konkýrsy - Hakaton bastaldy. Atalǵan shara Polıtehnıkalyq kolledjde ótip jatyr, dep habarlaıdy QazAqparat tilshisi.
Hakaton kezinde kolledj stýdentteri san alýan óndiristik tapsyrmalardy oryndap, naqty bir sheshimderdi usynady. Al jumys berýshiler jastardyń qarym-qabiletterin baǵalap, úzdik dep tanylǵandardy óndiristik is-tájirıbeden ótýge shaqyratyn bolady.
Іs-sharaǵa respýblıkanyń túkpir-túkpirinen shamamen 150 kolledj stýdenti keldi. Jumys berýshilerdiń tapsyrysy boıynsha naqty bes baǵyt belgilendi. Olar - qurylys, elektr energetıkasy, munaı-gaz, taý-ken metallýrgııa jáne aqparattyq tehnologııalar. Konkýrs kezinde jumys berýshiler stýdentterge atalǵan salalar boıynsha tapsyrmalar beredi. Al stýdentter ony sheshýi tıis.
«Máselen, taý-ken óndirisinde belgili bir qural-jabdyq synyp qaldy. Qatysýshylar dál osy máseleni sheshý joldaryn usynady. Jóndeý jumystaryn qalaı júrgizedi? Oǵan qansha ýaqyt ketedi? Qarjylaı shyǵyndary qandaı? Stýdentter osynyń bárin eseptep, naqty josparyn usynýy shart. Árbir jobanyń tıimdiligi jeke-jeke baǵalanady. Úzdik dep tanylǵandar óndristik is-tájirıbege shaqyrylady. Artynan jumysqa turýǵa da múmkindik týady», - deıdi uıymdastyrýshylar.
Hakatonnyń uıymdastyrýshylary - QR Bilim jáne ǵylym mınıstrligi, Astana qalalyq bilim basqarmasy jáne ERG kompanııasy.
