Astanada kolledj ben mektepterdiń Nursultan esimdi oqýshylary han doıby oıynynda saıysqa túsedi
ASTANA. Qazannyń 7-si. QazAqparat - Qazannyń 9-y kúni Astananyń kolledjderi men mektepterinde oqıtyn Nursultan esimdi oqýshylardyń arasynda «Han qalada - Han doıby» atty jarys ótedi.
Jarys № 59 mektep-lıtseı ǵımaratynda bolady. Uıymdastyrýshy - «Astana» jýrnaly.
Han doıbysynyń ǵajaıyby - onyń kestesinde. Onda astronomııalyq ilimnen bastap fılosofııa, ekonomıka, ǵylym, mádenıet, saıasat, memleket qurý júıesi sııaqty taǵy basqa san alýan sala bir tuǵyrda toǵysady.
Baıaǵy baǵzy zamannan beri handardyń, bılerdiń, baılardyń el basqarý, memleket qurý aqyldaryn syn tezine túsirip synaıtyn aqyl-parasat maıdany bul kúnde sharshy taqtada jalǵasyn tappaq. Han doıbysy - jalpy on jyldan astam ýaqytta qazaqtyń rýhanııatyn qadala baǵyp baıqaýmen, san saraptap salystyrý paıda bolyp, jetilgen oıyn.
Onyń kestesi qazaqtyń oıý-órnekterimen naqyshtalǵan. Al taqtadaǵy ortaq fıgýra - qazaqtyń kıiz úıi. Kıiz úıdiń syrtyndaǵy oıý-órneginiń, shańyraǵynyń túsi arqyly olardyń ataq-dárejesin, naqtylaı aıtsaq hany men qarashasyn, bıi men batyryn anyqtaýǵa bolady. Bul - aqyl-parasattyń, el basqarýdaǵy ilkimdilikti synaý oıyny.
Han doıbysy balalar men jasóspirimderdiń aqyl-órisiniń jetilýin tezdetedi, qapııada amaldaýǵa, aqyldy ádis-tásilderge jattyqtyrady. Jetkinshekterge, jastarǵa rýhanı, ekonomıkalyq jáne áskerı saıasattyń salmaqtylyǵyn tanytyp, memleket qurýda árqaısymyzdyń ornymyz bar ekenin uǵyndyrýda bul oıynnyń bereri mol.
