Astanada kólikke tehnıkalyq qyzmet kórsetý ortalyǵynda órt shyqty
ASTANA. KAZINFORM — Astana qalasynyń órt sóndirýshileri Almaty aýdanyndaǵy Saryaǵash ótkelinde ornalasqan jeke bir qabatty avtoservıstiń ǵımaratynda shyqqan órtti oqshaýlady, dep habarlaıdy TJM baspasóz qyzmeti.
Alǵashqy órt sóndirý bólimsheleri kelgen kezde avtoservıs ǵımaratynda qoıý tútin men ashyq janý baıqaldy. Órt sóndirý qondyrǵylary dereý iske qosyldy, sý úzdiksiz jetkizildi. Órt sóndirýshilerdiń jedel áreketteriniń arqasynda ottyń jaqyn ornalasqan ǵımarattarǵa taralý qaýpi joıyldy.
— Saǵat 20:09–da 102 pýltine Almaty aýdanynda ornalasqan birqabatty tehnıkalyq qyzmet kórsetý ortalyǵy janyp jatqany týraly habarlama kelip tústi. Aldyn ala málimet boıynsha órt 120 sharshy metr aýdandy sharpyǵany anyqtaldy. TJD qyzmetkerleriniń arqasynda órttiń basqa ǵımarattarǵa taralýy toqtatyldy. Oqıǵa ornyna 4 negizgi tehnıka jáne 20 órt sóndirýshi jumyldyryldy. Zardap shekkender týraly málimet túspedi. Saǵat 20:35–te órt oqshaýlandy, — dedi Astana qalasy TJD ÓSKQ jedel kezekshisiniń orynbasary Aıtýǵan Bekenov.
Osyǵan deıin Petropavlda kólik júrgizýshisi órttiń dúkenge taralýyna jol bermegenin jazǵanbyz.