Astanada kólik júrgizý quqyǵy joq 185 adam rólge otyrǵan
ASTANA. KAZINFORM — Astanada ótken «Qaýipsiz jol» jedel-profılaktıkalyq is-sharasy barysynda kólik basqarý quqyǵy joq nemese júrgizýshi kýáliginen aıyrylǵanyna qaramastan rólge otyrǵan 185 adam anyqtaldy.
Bul týraly Astana qalasy Polıtsııa departamenti Ákimshilik polıtsııa basqarmasynyń bastyǵy, polıtsııa polkovnıgi Nurlan Ývaev Óńirlik kommýnıkatsııalar qyzmetinde ótken baspasóz konferentsııasynda málim etti.
Reıd barysynda jol-kólik oqıǵasyna sebep bolýy múmkin quqyq buzýshylyqtarǵa erekshe nazar aýdaryldy.
— «Qaýipsiz jol» jedel-profılaktıkalyq is-sharasy kezinde kólik basqarýǵa quqyǵy joq bolsa da rólge otyrǵan 185 adam anyqtaldy, — dedi Nurlan Ývaev.
Onyń aıtýynsha, is-shara aıasynda mas kúıinde kólik júrgizý, qaýipti manevr jasaý, qarsy baǵytqa shyǵý, jaıaý júrginshiler ótkelinen ótý qaǵıdalaryn buzý jáne ózge de óreskel quqyq buzýshylyqtar erekshe baqylaýda boldy.
Polıtsııa mundaı quqyq buzýshylyqtardyń jol qozǵalysyna qatysýshylardyń ómiri men densaýlyǵyna qaýip tóndiretinin atap ótip, olardy anyqtaý jáne jolyn kesý baǵytyndaǵy jumys turaqty túrde jalǵasatynyn málimdedi.
Eske salaıyq, 25 tamyzdan bastap «Jol júrisi týraly» zańǵa engizilgen ózgerister kúshine enip, júrgizýshilerge qoıylatyn talaptar men jekelegen quqyq buzýshylyqtar úshin jaýapkershilik kúsheıtiledi.
