Astanada kólik salonynan aqsha jymqyrǵan kúdikti ustaldy
ASTANA. KAZINFORM — Elordada polıtseıler júrgizgen jedel-izdestirý is-sharalarynyń nátıjesinde avtokólikten aqsha urlady degen kúdikpen jas jigit anyqtalyp, polıtsııa bólimshesine jetkizildi. Bul týraly Polisia.kz jazdy.
Tergeý málimetinshe, kúdikti qyzyl tústi Volkswagen Vento avtokóliginiń salonyna zańsyz kirip, ishinde bolǵan aqshalaı qarajatty jasyryn túrde ıemdengen. Kólik ıesine 200 myń teńge kóleminde materıaldyq shyǵyn keltirilgeni belgili boldy.
— Polıtseıler júrgizgen keshendi jedel is-sharalar barysynda kúdiktiniń jeke basy anyqtalyp, ustaldy. Qazirgi ýaqytta atalǵan derek boıynsha sotqa deıingi tergep-tekserý amaldary júrgizilýde. Tergeý barysynda ustalǵan azamattyń elorda aýmaǵynda buryn jasalǵan osyǵan uqsas qylmystarǵa qatysy bolýy múmkin ekeni de anyqtaldy, — delingen habarlamada.
Bul baǵyttaǵy tekserý jumystary jalǵasyp jatyr. Astana qalasynyń polıtsııa departamenti turǵyndardy jeke múlkiniń saqtalýyna muqııat qaraýǵa shaqyrady. Kólik ishinde aqsha, telefon, qujattar jáne ózge de baǵaly zattardy qaldyrmaǵan jón. Sondaı-aq avtokólikten ketken kezde onyń esikteri men terezeleriniń tolyq jabylǵanyna kóz jetkizý qajet. Polıtsııa azamattarǵa bótenniń múlkin jasyryn jymqyrýdyń zań boıynsha qylmystyq jaýapkershilikke ákep soǵatynyn eske salady.
Buǵan deıin Astanada meshitte telefon urlaǵan kúdikti ustalǵanyn jazǵan edik.
