Astanada kólik qoıý erejesin buzǵandarǵa baqylaý kúsheıtildi
ASTANA. KAZINFORM – Jol qozǵalysyn uıymdastyrý ortalyǵy Astana qalasynyń Polıtsııa departamentimen birlesip, avtokólik quraldaryn turaqqa qoıý jáne toqtatý qaǵıdalarynyń saqtalýyn turaqty negizde baqylaýda ustap keledi, dep habarlaıdy elorda ákimdiginiń resmı saıty.
Kezekti tekserý Aıtmatov kóshesi, 77/7 mekenjaıynda ornalasqan turǵyn úı turǵyndarynyń ótinishi negizinde júrgizildi. Turǵyndar kólikti turaqqa qoıý qaǵıdalarynyń júıeli túrde buzylatynyn, atap aıtqanda, múmkindigi shekteýli azamattarǵa arnalǵan turaq oryndaryn zańdy quqyǵy joq júrgizýshilerdiń ıelenip júrgenin habarlaǵan.
Oqıǵa ornyna jedel túrde barǵan qyzmetkerler quqyq buzýshylyq faktileriniń tolyq rastalǵanyn anyqtady. Tártip buzǵan júrgizýshilerge qatysty ákimshilik hattamalar toltyryldy.
Qyzmetterdiń jedel áreket etýi turǵyndarǵa, onyń ishinde júrip-turýy shekteýli azamattarǵa, aýla aýmaǵynda erkin ári qaýipsiz júrýine múmkindik beredi.
Ýákiletti organdar qaladaǵy jol ınfraqurylymy turaqty baqylaýda ekenin eske salady. Astanada quqyq buzýshylyqtardy anyqtaý jáne tirkeý úshin zamanaýı tehnıkalyq quraldar paıdalanylady. Mobıldi jáne statsıonarlyq baqylaý júıeleri kólikti toqtatý men turaqqa qoıý qaǵıdalaryn buzý faktilerin avtomatty túrde tirkeıdi.
«Turaqqa qoıýǵa tyıym salynady», «Toqtaýǵa tyıym salynady» jol belgileriniń talaptaryn buzǵan, sondaı-aq múmkindigi shekteýli azamattarǵa arnalǵan oryndardy zańsyz ıelengen kólikter aıyppul turaǵyna evakýatsııalanýy múmkin.
Quqyq qorǵaý organdary kólik ıeleriniń nazaryn joldar men aýlalardaǵy qaýipsizdik árqaısymyzǵa baılanysty ekenine aýdaryp otyr. Durys qoıylmaǵan avtokólik nemese kórý múmkindigin shekteıtin kedergiler jaıaý júrginshiler úshin úlken qaýip tóndiredi. Olardyń qatarynda egde jastaǵy adamdar, júrip-turýy shekteýli azamattar jáne eń bastysy balalar bar.
Aıta ketsek, osyǵan deıin almatylyq ár júrgizýshige tegin turaq orny berilýi múmkin ekenin jazǵanbyz.
