Astanada kólik keptelisin azaıtý úshin birqatar uıymnyń jumys kestesi ózgertiledi

ASTANA. KAZINFORM — Astanada 15 qyrkúıekten bastap kommýnaldyq kásiporyndar men memlekettik kompanııalarda jumys kúniniń bastalý ýaqyty ózgeredi dep josparlanyp otyr, dep habarlaıdy elorda ákimdiginiń resmı saıty.

Ákimdiktiń baspasóz qyzmetiniń málimetinshe, bul shara jol qozǵalysy júktemesin azaıtýǵa jáne kólik aǵyndaryn ońtaılandyrýǵa baǵyttalǵan.

— Ózgerister negizinen qalanyń ortalyq aýdandarynda ornalasqan memlekettik jáne kvazımemlekettik uıymdarǵa qatysty bolady. Al áleýmettik nysandardyń — mektepterdiń, medıtsınalyq mekemelerdiń, halyqqa qyzmet kórsetý ortalyqtarynyń jumys tártibi ózgerissiz qalady. Atalǵan sharalar tańǵy ýaqytta kólik aǵynyn teńdeı bólýge jáne qaladaǵy eń kóp kólik júretin magıstraldardyń júktemesin azaıtýǵa múmkindik beredi. Budan bólek, kólik quraldaryn tyıym salynǵan jerlerde toqtatý men turaq erejelerin buzý derekterine qatysty kóshe-jol jelisin ákimshilendirý jumysy kúsheıtiledi. Erejeni óreskel buzǵandardyń kólikteri aıyppul turaǵyna evakýatsııalanady, — delingen ákimdik taratqan aqparatta.

Sondaı-aq jańa jyldamdyq dálizderi men qoǵamdyq kólik baǵyttaryn qurý jumysy júrgizilip jatyr. Mundaı tájirıbe ózge megapolısterde de sátti qoldanylyp, oń nátıje kórsetip keledi. Aldyn ala esepteýler boıynsha, engiziletin sharalar kesheni tańerteńgi jáne keshki ýaqytta qala kóshelerindegi júktemeni 15-20%-ǵa azaıtýǵa múmkindik beredi.

Mamandardyń aıtýynsha, bul shara ekologııalyq jaǵdaıǵa da oń áser etip, qalalyq mobıldiliktiń jalpy sapasyn arttyra alady.

Qazirgi ýaqytta Astananyń ártúrli aýdandaryndaǵy kólik aǵyndaryna keshendi taldaý júrgizilip jatyr. Jumys kúniniń bastalý ýaqytyn ózgertýmen qatar, basqa da sharalar qarastyrylyp jatyr — mysaly, keıbir uıymdar úshin túski úzilis nemese aýysym aıaqtalý ýaqytyn ózgertý múmkindigi.

Budan buryn Astanada jańa saıabaǵy men demalys aımaǵy bar qoǵamdyq keńistik salynyp jatqany anyqtaldy.