Astanada kólikterdi mindetti tehnıkalyq baıqaýdan ótkizýdiń qajettiligi talqylandy
ASTANA. 7 jeltoqsan. QazAqparat - Astanada QR Kólik jáne kommýnıkatsııa mınıstrliginiń «Jol odaǵy» Úılestirý keńesimen birlese jáne QR Іshki ister mınıstrliginiń qoldaýymen uıymdastyrǵan «Joldardaǵy qaýipsizdik. Mindetti tehnıkalyq baıqaý - ómir qaýipsizdigi úshin» taqyrybynda halyqaralyq forým ótti,
dep habarlaıdy Kólik jáne kommýnıkatsııa mınıstrliginiń baspasóz qyzmeti.
Shara barysynda forým delegattary mindetti tehnıkalyq baıqaýdyń qajettiligin talqylap, BUU-na qatysýshy-elderdiń tájirıbelerin qarastyrdy.
Forým jumysyn ashqan Kólik jáne kommýnıkatsııa vıtse-mınıstri Qaırat Ábsattarov atap ótkendeı, búgingi kúni respýblıkamyzda 610 statsıonarlyq jáne mobıldik tehnıkalyq baıqaý jelileri jumys isteıdi. Osy jyldyń 11 aıy ishinde 2012 jyly tehnıkalyq baıqaýdan ótýi tıis 2,1 mıllıon kólik quralynyń 1,4 mıllıony baıqaýdan ótken.
Qaırat Ábsattarov, sonymen birge aǵymdaǵy jyly kólikterdi tehnıkalyq baıqaýdan ótkizýdiń sapasyn arttyrýǵa baǵyttalǵan sharalardyń júrgizilgeni týraly da aıtyp ótti.
«2012 jyldyń basynda tehnıkalyq baıqaýdan ótkizý kommertsııalyq ortaǵa berilip, kólikterdiń shyǵarylǵan jylyna baılanysty tehnıkalyq baıqaýdan ótkizýdiń dıfferentsııalanǵan merzimi engizildi, keıbir talaptar alynyp tastaldy. Tehnıkalyq baıqaýdan ótkizý tehnologııasynyń jetildirilýine baılanysty «Jol qozǵalysynyń qaýipsizdigi týraly» Zańǵa ózgertýler engizildi. Tehnıkalyq baıqaýdy uıymdastyrý men ótkizý erejeleri ázirlendi. Kólikterdiń tehnıkalyq baıqaýdan ýaqytynda ótýin baqylaýdy kózdeıtin «Tehnıkalyq baıqaý» biryńǵaı aqparattyq júıesi engizildi», - dep atap ótti ol.
Shara barysynda avtokólik quraldaryn tehnıkalyq baıqaýdan ótkizýdi uıymdastyrýdyń halyqaralyq tájirıbesi usynyldy.
Atap aıtqanda, Ispanııa jáne Latyn Amerıkasynda tehnıkalyq baıqaýmen aınalysatyn kompanııanyń ókili Djýan Rodrıgez, Ispanııada kóligin ýaqytynda tehnıkalyq baıqaýdan ótkizbegen avtokólik ıesine 150 eýro kólemine deıin aıyppul salynatyndyǵyn aıtyp ótti. Al kólikti baıqaýdan ótkizýdiń quny ortasha eseppen jeńil avtokólikter úshin 35 eýro, al júk kólikteri úshin 45 eýrony quraıdy. Tehnıkalyq baıqaýdan ótkizý kezinde kólikten qandaı da bir aqaý tabylsa, kólik ıesine aqaýdy joıýǵa ýaqyt beriledi.
Avtokólik quraldaryn baqylaý máselesi jónindegi táýelsiz sarapshy Abdel Kessasıdiń pikirinshe, búgingi kúni tehnıkalyq baıqaýdy uıymdastyrýdyń eń qalyptasqan júıesi Fınlıandııada. Bul elde osydan 90 jyl buryn atalǵan júıe engizilgen jáne tehnıkalyq baıqaýdan ótpegen avtokólikti qoldaný oqıǵalary kezdespeıdi eken. Al, Japonııa elinde avtokólikterdi tehnıkalyq baıqaýdan ótkizýge óte qatań qaraıdy. Tehnıkalyq baıqaýdan ótý 100 parametr boıynsha júzege asyrylady, al tekserý kezinde qandaı da bir aqaý tabylǵan jaǵdaıda avtokólikti tipti qaıtadan bólshektep tastaýy múmkin.
