Astanada kólik urlaýmen shuǵyldanǵan qylmystyq top ustaldy
ASTANA. 5 sáýir. QazAqparat /Jasulan Amanbaıuly/ - Astana qalasynda kólik urlaýmen shuǵyldanǵan qylmystyq top quryqtaldy.
Bul týraly búgin, 5 sáýir kúni jýrnalısterge qalalyq ІІD Jol polıtsııasy basqarmasynyń bólim bastyǵy Eljan Chýpekov málim etti.
Ustalǵan úsh jigit Astana aýmaǵynda 16 kólikti aıdap áketkenderi jóninde moıyndady. E. Chýpekovtyń aıtýynsha, qazirgi ýaqytta urlanǵan 10 kólik tabylǵan. Olardy ıelerine qaıtarý sharalary júrgizilýde.
Kúdiktiler 3 kólikti minip, Astana - Pavlodar tas jolynyń shyǵys jaǵyndaǵy egistik jerdiń súrleýli jolymen ketip bara jatqan jerinde anyqtalady.
«Tekserý kezinde úsh kóliktiń ekeýi aıdap áketilgen bolyp shyǵady. Alaıda tutqyndaý kezinde olar quqyq qorǵaýshylarǵa qarýly qarsylyq kórsetip, 5 ret oq atady. Qarańǵylyqty paıdalanyp jasyrynbaq bolǵan. Tek Jol polıtsııasy qyzmetkerleriniń bilikti is-qımyldarynyń nátıjesinde bir kúdikti sol orynda quryqtalyp, urlanǵan eki avtokólik tárkilendi»,-dedi E. Chýpekov.
Jedel-izdestirý sharasy kezinde qalǵan ekeýi az ýaqyttyń ishinde qala ishinde ustalǵan. E. Chýpekovtyń atap ótkenindeı, atalǵan top Astanada kólik urlaýmen jarty jyldan astam ýaqyt aınalysyp kelgen. Sonymen qatar kólikterdi jyldam ótkizip otyrǵandyqtan, olardy anyqtaýǵa múmkindik bolmaǵan. Qylmystyq top kóbine kóp «Aýdı» jáne «Folksvagen» markaly 1993 jylǵa deıin shyǵarylǵan kólikterge kásiptengen. «Sebebi 1993 jylǵa deıin shyǵarylǵan kólikterdiń qaýipsizdik quraldary men dabylqaqqyshtary joq»,-deıdi E. Chýpekov.
Qalalyq ІІD baspasóz qyzmetiniń málimetteri boıynsha, jyl basynan beri elordada 68 avtokólik aıdap áketý jáne urlaý oqıǵalary anyqtalǵan. Onyń 57-si tabylyp, qylmysty ashý úlesi 83 paıyzdy qurap otyr.
