Astanada kólik turaqtarynyń jetkiliksizdigi. Mádenıetsizdik álde sharasyzdyq
ASTANA. QazAqparat - Sońǵy 10 jyldyń ishinde elordada avtokólik sany eselep óskeni baıqalady. Máselen, QR UEM Statıstıka komıtetiniń málimetterine sáıkes 2003 jyly elordada 63,7 myń jeńil avtomobıl tirkelse, 2017 jyldyń aqpanynda bul sany shamamen 4 esege ósip, 246,9 myń kólikti quraǵan, dep habarlaıdy QazAqparat.
Kólik turaǵy búginde tek qana júrgizýshilerdiń ǵana emes sonymen birge jaıaý júrginshiniń de bas aýyrtar basty problemasyna aınalǵany jasyryn emes. Temir tulpardy tizgindegender qala kósheleri men úı aýlalaryndaǵy kólik turaqtarynyń jetkiliksizdigine narazylyq tanytyp jatady. Al jaıaý júrginshiler, men velesıped tepkender, taza aýaǵa sábıin kolıaskamen serýendetýge shyqqan jas analar bolsa jaıaý júrginshi jolyna, aýlalarda qalaı bolsa solaı beıbereket kóligin qoıyp ketken júrgishilerge renishterin bildiredi.
Aǵymdaǵy jyldyń ózinde ǵana Astanada kólik aıaldamasy men turaǵy erejesin buzyp, jaıaý júrginshi jolyna, balalar men sporttyq alańdarǵa, tipti gúlzarlarǵa kóligin qoıyp ketken 800-den astam júrgizýshi jazaǵa tartylǵan eken. Jol belgileri erejesin saqtamaǵany úshin jazaǵa tartylǵan elordalyqtardyń sany 9 myńǵa jýyqtaıdy.
Al bul problemany sheshýge kim jaýapty? Qurylysshylar men bılik organdary barlyq turǵyndardyń, onyń ishinde kólik ıeleriniń de salyǵyna avtomobılderge arnalǵan arnaıy turaqtar salýǵa tıis pe?
Astana ákimdigi bul máselede qala turǵyndaryn jappaı qoǵamdyq kólikke otyrǵyzý qajet dep sanaıdy. Árıne, olardyń dittegeni oryndalar bolsa, qala kósheleri qaptaǵan kólikten qutylyp, elorda aýasy da las tútinnen arylar edi.
Qala bıliginiń PricewaterhouseCoopers halyqaralyq uıymynyń zertteýlerine súıene keltirgen derekterine sáıkes, kólik qojaıyndarynyń 80 paıyzy óz kólikterin ortasha eseppen 8-9 saǵatqa jumys ornynyń janyna qaldyrsa, turǵyn úı keshenderi terezesiniń túbinde kólikter 13-14 saǵat boıy qańtarylyp turady eken. Al jabyq avtoparkıngti paıdalanatyndardyń úlesi 15-20 paıyz ǵana.
Kólik turaǵy tapshylyǵyn sheshýdiń bir jol retinde Astana ákimdigi aqyly turqtar salýdep esepteıdi. Bul baǵyttaǵy jumystar júrgizilip te jatyr. Máselen, Nurjol jelek jolynda 910 kólikke arnalǵan turaq salynýda. Onda 1 saǵatqa kólik qaldyrý 100 teńgeni quraıdy. 
