Astanada kólik turaǵy keńistigin basqarý jobasy iske qosylmaq

ASTANA. QazAqparat - Elordada kólik turaǵy keńistigin basqarý jobasy júzege asyrylady. Bul týraly búgin elordada «Astana qalasynyń kólik kesheniniń damý úrdisi» atty konferentsııada qala ákimi Áset Isekeshev.

«Mańyzdy baǵyttardyń biri kólik turaǵy keńistigin basqarý jobasyn iske asyrýǵa baılanysty. Bul joba halyqaralyq konsýltanttardyń qatysýymen daıarlandy. Onda kóshedegi turaqtar, vokzal mańyndaǵy aýmaqtar, aıyp turaqtary, úı mańyndaǵy aýmaqtar eskerilip otyr. Biz túsinemiz, joǵaryda atalǵan sharalar qala turǵyndary úshin belgili bir qolaısyzdyq týdyrýy múmkin.  Alaıda osy júıelik keshendi sharalar álemdik úzdik tájirıbe negizinde jasaldy», - dedi Astana ákimi.

Onyń sózine qaraǵanda, keshendi sharalar shahardaǵy trafık pen kóliktik júıeni durys damytýǵa múmkindik beredi. Eger de qazirden osy jumystar iske asyrylmasa, onda qalada kólik keptelisteri arta túsýi yqtımal.

Sonymen qatar ol joldaǵy qozǵalysty uıymdastyrý ortalyǵy qurylǵanyna toqtala kele, bul ortalyq kóliktik keńistikke monıtorıng júrgizip, tıimdi basqarýdy qamtamasyz etetinin atap ótti. Sonymen qatar zııatkerlik kóliktik júıe engizilýde, osy rette qaladaǵy 358 baǵdarshamnyń 42-si atalǵan júıege qosylǵan. 2019 jylǵa deıin júıemen barsha qala qamtylady.

Belgili bolǵandaı, biryńǵaı dıspetcherlik ortalyqpen qazirgi zamanǵy birkelki taksı qyzmetin qurý boıynsha joba júzege asyrylady.