Astanada kólik turaǵy keńistigin basqarý jobasy iske qosyldy

Jobanyń alǵashqy kezeńi «Nurjol» jelekjolynda júzege asyrylyp, búgingi kúni 472 turaq oryny belgilenip otyr. Avtoturaqtardyń jumys reti, aqy tóleý tártibi týraly Astanada ótken baspasóz máslıhatynda qalalyq jolaýshylar kóligi basqarmasynyń basshysy Bekmyrza Igenberdınov tolyǵyraq aıtyp berdi, dep habarlaıdy «QazAqparat» HAA tilshisi.

Aqyly kólik turaqtary júıesiniń jumysyn úılestirý jáne qyzmet kórsetý sapasyna baqylaý júrgizýdi dıspetcherlik ortalyq júzege asyrmaq. Bıyl elordadaǵy Esil, Saryarqa jáne Almaty aýdandarynyń aýmaǵynda 9 myńnan astam kólikke arnalǵan turaq qurylatyn bolady.

Bekmyrza Igenberdınovtyń aıtýynsha, QR Prezıdentiniń qatysýymen 2016 jyldyń 27 sáýirinde ótken keńeste Elbasy aqyly kólik turaǵy júıesin uıymdastyrý boıynsha naqty mindet qoıǵan. Elorda ákimdigi osy tapsyrmany oryndaý úshin júıeli daıyndyq jumystaryn júrgizip, synaq jobalardy tekserýden ótkizip, barlyq artyq jaqtary men kemshin tustaryn saralaǵan.

«Avtokólik ıelerine turaq aqysyn tóleýdiń balamaly nusqalarynyń mol múmkindikteri usynylyp otyr. Atap aıtqanda, parkomat arqyly qolma-qol aqsha nemese bank kartasymen tóleý, SMS joldaý nemese jeke kabınet arqyly tóleý, «Kassa 24» termınaldary jáne arnaıy mobıldik qosymsha kómegimen tóleý múmkindikteri qarastyrylǵan. Turaq aqysy tańǵy 8-den keshki 20:00-ge deıin saǵatyna - 100 teńge. Tólemaqy turaq sessııasy bastalǵan sátten bastap, alǵashqy otyz mınýt ishinde júzege asyrylýy tıis. Demalys jáne mereke kúnderinde turaqqa kólikti qaldyrý tegin», - deıdi Bekmyrza Igenberdınov.

Basqarma basshysynyń aıtýynsha, parkomattar ornalasqan oryndar, olardy paıdalaný tártibi jáne tólem tásilderi týraly tolyǵyraq málimetti www.2888.kz saıty nemese 8-7172 57 64 81 nómirine habarlasyp bilýge bolady. Turaq qyzmetin tegin paıdalaný quqyǵyna UOS ardagerleri, kólikterin arnaıy bólingen oryndarǵa qoıatyn birinshi jáne ekinshi top múgedekteri, «Altyn Qyran» jáne «Halyq qaharmany» ordenderiniń ıegerleri, «Altyn Alqa» jáne «Kúmis Alqa» taǵynǵan kóp balaly analar, Semeı ıadrolyq polıgonynda júrgizilgen synaqtardan zardap shekkender, sondaı-aq, Aýǵanstandaǵy jáne basqa da elderdegi áskerı qımyldarǵa qatysqan ardagerler men múgedekter ıe.

«Jańa joba kólik magıstraldaryn júıesiz turaqtardan aryltyp, qozǵalysy kóp kóshelerde kólik kóptelisterin azaıtýǵa múmkindik beredi. Sondaı-aq kóptegen júrgizýshilerdi qoljetimdi kólik turaqtarymen qamtamasyz etedi. Qalamyzda qazirdiń ózinde jumys istep turǵan osyndaı turaqtyń jaǵymdy úlgisi retinde «Astana» temirjol vokzaly aýmaǵyndaǵy aqyly turaqty aıtýǵa bolady. Bul jerde avtokóliktiń ótý jáne qozǵalys qabileti birneshe esege artty, keptelis azaıdy. Endi júrgizýshiler, burynǵydaı táýlik boıy zańsyz taksıshilerdiń kólikterinen bosamaıtyn turaqtan oryn taba almaı shyr aınalyp júrmeıtin boldy», - deıdi Bekmyrza Igenberdınov.