Astanada kólik tonaýmen aınalysyp kelgen ury ustaldy
ASTANA. QazAqparat - Astanadaǵy Almaty aýdandyq polıtsııa basqarmasy qylmystyq polıtsııa bóliminiń qyzmetkerleri avtomobılder salonynan zat urlaýmen aınalysty degen kúdikpen 24 jastaǵy jigitti ustady, dep habarlaıdy QazAqparat Astana polıtsııa departamentiniń baspasóz qyzmetine silteme jasap.
Aqmola oblysynyń turǵyny 14 márte kólik tonaǵan.
Baýkespe mashına salonynan ne tapsa da jymqyra bergen. Oǵan tańylǵan urlyqtar arasynda aqsha da bar, uıaly telefon da, ámııan da, sómke, akkýmýlıator, jeke buıymdar, vıdeotirkeýish, tipti salonda qaldyrylǵan teledıdarǵa deıin bar.
Taratyp aıtaıyq, polıtsııaǵa shaǵymdanǵan qala turǵyndarynyń biri belgisiz bireý túnde Manas kóshesinde turǵan mashınasynan ishinde 250 myń teńgesi, jeke kýáligi, bank kartalary bar barsetkany urlap ketkenin aıtyp shaǵymdanǵan.
Buryn avtomobıl urlaǵany úshin jaýapqa tartylǵan kúdikti Astana polıtsııa departamentiniń ızolıatoryna qamaldy. Jábirlenýshiler odan da kóp bolýy múmkin.
Polıtsııa osy adamnyń qylmysynan zardap shekken azamattardan Almaty aýdandyq polıtsııa basqarmasyna 8 (7172) 71-67-08, 71-67-24, 71-67-14, 8 7024787808 nemese «102» nómirleri arqyly habarlasýyn suraıdy.
