Astanada kólik satýmen aınalysatyn reseılik jalǵan fırmaǵa tosqaýyl qoıyldy
ASTANA. QazAqparat - Astanada kólik satýmen aınalysatyn reseılik jalǵan fırmaǵa tosqaýyl qoıyldy. Bul týraly brıfıng barysynda Astana qalalyq prokýratýrasy ekinshi basqarmasynyń prokýrory Erlan Baımuhambetov málim etti.
«Rýbl baǵamynyń qunsyzdanýyna baılanysty Reseı Federatsııasynan kólik satýmen aınalysatyn kompanııa ashylǵan. Bul bizdiń azamattarymyz Reseıden arzan kólik alýǵa aǵylǵan kezde oryn aldy. Muny Reseı azamattary paıdalanyp, Astanadan zańsyz baıý maqsatynda RF-dan avtomobıl ákep satýmen aınalysatyn JShS ashqan», - dedi prokýror.
Onyń sózine qaraǵanda, atalǵan alaıaqtardan kóptegen azamattarymyz zardap shekken. Búginde olardyń sany 27 adamǵa jetip otyr.
«Atalǵan bandanyń bir múshesi ustaldy. Qazirgi ýaqytta atalǵan qylmystyq istiń tergeý amaldary aıaqtalýǵa jaqyn. Zardap shegýshiler kólikterge aldyn ala mol soma tólegenimen, ony almaǵan», - dedi E.Baımuhambetov.
