Astanada kólik salyǵy boıynsha bereshek 2,1 mlrd teńgeni qurap, quzyrly organdar reıdke shyqty

ASTANA. QazAqparat - Astana qalasy boıynsha Memlekettik kirister departamenti avtokólik quraldary úshin salyq bereshegin óndirip alý boıynsha «Boryshker» jedel-aldyn alý is - sharasy ótkizip jatyr, dep habarlaıdy QazAqparat vedomstvonyń baspasóz qyzmetine silteme jasap.

Baspasóz málimetterine qaraǵanda, atalmysh is-shara Astana qalasynyń polıtsııa basqarmasymen jáne jeke sot oryndaýshylarynyń óńirlik palatasymen birlesip júzege asyrylýda.

Búgingi tańda jeke tulǵalardyń kólik quraldaryna salynatyn salyq boıynsha beresheginiń jalpy somasy 2,1 mlrd teńgeni quraıdy.

Reıdtik is-sharalardy ótkizý barysynda 97 mln teńge óndirildi.

Іs-sharalardy ótkizý barysynda Lexus, Toyota Land Cruiser, Mercedes Benz, Tundra markaly jáne qozǵaltqysh kólemi 4 000 tekshe sm-den asatyn 20-dan astam kólik aıyppul turaǵyna qamaldy.

Aldaǵy ýaqytta is-shara jyl sońyna deıin turaqty túrde jalǵasatyn bolady.

Bul rette kgd.gov.kz saıtynyń jáne «e-Salyq Azamat» mobıldi qosymshalary men ekinshi deńgeıdegi bankter kómegimen qaryzdy tekserýge bolady.

Astana qalasy boıynsha MKD salyqtar boıynsha bereshegi 1 aılyq eseptik kórsetkishten (AEK) asatyn avtokólik ıelerin jeke sot oryndaýshylarynyń qyzmetterine aqy tóleý boıynsha qolaısyzdyqtardy boldyrmaý úshin salyq bereshegin tolyq óteýge shaqyrady.