Astanada kólik polıtseıleri arasynda qazaq kúresinen jarys ótti
Kezekti jarysqa 8 komanda jınaldy, olardyń qatarynda Astana garnızony kúsh qurylymdarynyń eń myqty palýandary bar. Uıymdastyrýshylardyń aıtýynsha, komandalar quramyna jedel qyzmetterden, tergeý, anyqtaý jáne ishki ister organdarynyń basqa da bólimshelerinen sportshylar qatysty.
Jarys komandalyq olımpıada júıesi boıynsha 60 kg-nan 85 kg-ǵa deıingi, 90 kg-nan 100+ kg-ǵa deıingi salmaq dárejesinde ótti. Qatysýshylar eń úzdik palýan ataǵy úshin tabandy ári qajyrly kúreste bar kúshin saldy.
«Ózderińiz biletindeı, bul jarys birinshi ret ótip otyrǵan joq, shara departamenttiń jyl saıyn ótkiziten dástúrine aınaldy», -deıdi Kóliktegi PD bastyǵy, polıtsııa polkovnıgi Amanjol Qabylov.
Habarlamada aıtylǵandaı, Kólik polıtsııasy qyzmetkerleri arasynda halyqaralyq dárejedegi sport sheberleri, kúsh qurylymdary arasyndaǵy álem chempıondary, «Qazaq kúresi», sambo jáne dzıýdodan birneshe márte chempıondar qyzmet etedi.
Máselen, Talǵat Qojabaev - halyqaralyq dárejedegi sport sheberi, kúshtik qurylymdar arasynda 3 dúrkin álem chempıony, qazaq kúresi, sambodan jáne dzıýdodan birneshe márte chempıon. 2017 jyly ol AQSh-ta 67 memlekettiń polıtseıleri arasynda ótken Búkilálemdik oıyndardyń júldegeri atandy.
Jiger Sákenuly -Sambodan úsh dúrkin álem chempıony. Dzıýdo, sambo, qazaq kúresinen sport sheberi.
Jigerli jáne tabandy kúrestiń qorytyndysy boıynsha jeńimpazdar anyqtaldy. QR ІІM Kóliktegi polıtsııa departamenti bastyǵynyń kýbogyn Kóliktegi PD komandasy ıelendi.
Ekinshi orynda - Astana qalasy polıtsııa departamenti komandasy, jeńimpazdar úshtigin QR ІІM Ulttyq ulan komandasy qorytyndylady.
Sporttyq sharanyń saltanatty ashylýyna Departament basshylyǵy men jeke quramy qatysty. Qurmetti qonaqtar qatarynda QR Parlamenti Májilisiniń depýtaty Taras Hıtýov, «Qazaq kúresi» boıynsha QR eńbek sińirgen sport sheberi, «Qazaqstan barysy» jáne «Eýrazııa barysynyń» úsh dúrkin jeńimpazy Beıbit Ystybaev, «Qazaq kúresi» boıynsha QR eńbek sińirgen sport sheberi, «Qazaqstan barysy» týrnıriniń jeńimpazy, «Álem barysynyń» eki dúrkin jeńimpazy jáne tórt dúrkin álem chempıony Aıbek Nuǵumarov boldy.
