Astanada kólik qozǵalysy shekteledi
ASTANA. QazAqparat - 12 jeltoqsanda «Astana-Arena» stadıonynda estradalyq ánshi Qaırat Nurtastyń «Men ǵashyqpyn» atty jeke kontserti ótedi.
Kesh qonaqtary Tımatı, Nıýsha, Indıra Elemes sııaqty belgili ánshiler bolmaq. Satylǵan bıletterden túsken qarajattiń bir bóligi qaıyrymdylyqqa jumsalady. Búginde 21 000-nan astam bılet satylǵan. Kontsertke bıletti ticketon.kz, kassir.kz saıttarynda, sondaı-aq «Astana-Arena» stadıonynyń kassasynan satyp alýǵa bolady.
Astana qalalyq ІІD aqparatyna sáıkes, elordanyń ІІD ÁPB qoǵamdyq kólik pen taksıden basqa kólik qozǵalysyn shekteý sharalaryn qabyldaıdy. Saǵat 17.00-den bastap shara aıaqtalǵanǵa deıin Kereı Jánibek handar kóshesinen Hýseın ben Talal kóshesine deıin ýchaskede Qabanbaı batyr jáne Turan dańǵyldary jabylady. Usynylatyn aınalma marshrýt - Orynbor kóshesi boıynsha. Astana ІІD ÁPB kontsertke kelgisi keletin kólik ıelerinen óz kóligimen emes, qoǵamdyq kólikpen kelýdi ótinedi. Tájirıbe kórsetkendeı, «Astana-Arenada» osyndaı sporttyq-buqaralyq, mádenı sharalar ótkende kórermenderdi tasýdyń negizgi túri retinde qoǵamdyq kólikti paıdalaný óz tıimdiligin dáleldegen. Kórermenderdi jınaý men kontsertke jetkizý myna mekenjaılar boıynsha arnaıy reıstermen alty pýnktte júrgiziledi: «Qazaqstan» SK aldynan, (Qajymuqan kóshesi boıynsha); «Haziret Sultan» meshiti (Qoshqarbaev dańǵyly boıynsha); «Nur Astana» meshiti (shyǵys jaqtaǵy avtoturaqtan); elordalyq tsırk mańynan (Qorǵaljyn tas joly boıynsha avtoturaq); Q.Muńaıtpasov atyndaǵy stadıon avatoturaǵynan (Kenesary kóshesi boıynsha); «Jastar» teatry janynan (burynǵy opera teatry, Zataevıch kóshesi). Arnaıy reıstik avtobýstarda bılet quny: eresekterge - 90 teńge, 15 jasqa deıingi balalarǵa - 40 teńge, jol júrý bıletteri jaramsyz. Joǵaryda aıtylǵan 6 núkte boıynsha arnaıy reıstik avtobýstar júredi, sondaı-aq №10, 12, 27, 28, 30, 40, 43, 51, 61 marshrýttary qatynaıdy, dep atap ótti elordalyq ákimdiktiń baspasóz qyzmetinen.
