Astanada kólik dońǵalaqtaryn urlap alyp jatqan jigit taban astynda ustalyp qaldy
ASTANA. QazAqparat - Elordalyq polıtseıler kólik dońǵalaǵy urlanǵanyn ıesinen buryn baıqap, qaskúnemdi qolǵa túsirdi, dep habarlaıdy Astana qalasy ІІD baspasóz qyzmeti.
Aǵymdaǵy jyldyń 31 naýryzy kúni tańerten erte Astana qalasy ІІD Jedel basqarý ortalyǵynyń baqylaý kameralarynyń kezekshi ınspektory, polıtsııa serjanty Dýlat Qasqyrbaev qyzmeti kezinde Ýálıhanov kóshesi boıyndaǵy turaqta turǵan avtokóliktiń dońǵalaqtaryn sheship jatqan er adamdy baıqap qalǵan. Tekserý úshin Jedel basqarý ortalyǵynyń qyzmetkeri polıtsııa narıadtyn baǵyttaǵan.
Oqıǵa ornyna jedel jetken polıtseıler qaskúnemdi quryqtap, «Almaty» aýdandyq ІІB-ge jetkizedi. Aqmola oblysynyń 23 jastaǵy turǵyny dońǵalaqtardy urlap alyp, óz kóligine qoımaqshy bolǵandyǵyn moıyndady.
Atalǵan fakt boıynsha sotqa deıingi tergeý júrgizilýde. Polıtseıler avtokólik ıesine bolǵan jaıtty habarlady. Óz kezeginde azamat jeke múlkiniń urlyǵynyń jolyn kesken tártip saqshylaryna alǵysyn bildirdi. Tárkilengen kólik dońǵalaqtary ıesine qaıtaryldy.
Oǵan qosa, quryqtalǵan kúdiktiniń osyǵan deıin qala aýmaǵynda jasalynǵan basqa da qylmystarǵa qatysy anyqtalýda.
Astana qalasy Іshki ister departamenti múliktiń qaýipsizdigi maqsatynda qala turǵyndary men qonaqtaryna avtokólik salonynda baǵaly zattardy qaldyryp ketpeýge jáne kólikti kúzetiletin arnaıy turaqqa qoıyp, dabyl juıesin ornatýǵa keńes beredi.
