Astanada qoldanystaǵy nysandarǵa «únemdeý sertıfıkaty» tapsyrylyp jatyr
ASTANA. QazAqparat - «Jasyl ekonomıka jáne «G-Global» damý koalıtsııasy» basqarmasy áleýmettik nysandardan bastap, iri saýda ortalyqtaryna deıin «únemdeý sertıfıkatyn» tapsyrýǵa ázir ekendigin málim etti.
Atalǵan sertıfıkatqa ıe bolý nysandardaǵy elektr energııasy, jylý jáne sýdy únemdeýge septigin tıgizbek, dep habarlaıdy «QazAqparat» HAA tilshisi.
Atalǵan standart qonaq úılerdiń, qurylyspen aınalysatyn uıymdardyń, qozǵalmaıtyn múlik nysandaryn paıdalanatyn uıymdardyń energııalyq tıimdiligin, resýrsyn únemdep, ekologııalylyq deńgeıin arttyrýǵa baǵyttalǵan. Demek, osy salanyń mamandary sertıfıkatqa ıe bolǵysy kelgen nysandardyń resýrsty jumsaýyn teksere kele tıisti keńester men nusqaýlardy usynady. Nysan sharttarǵa saı kelgen jaǵdaıda olarǵa kezeń-kezeńimen qola, kúmis jáne altyn sertıfıkattar tabystalady.
«Bul sertıfıkat eń aldymen iri qalalardaǵy qonaq úılerdiń energııa jáne jylý, sý únemdeýi úshin asa qajet. Nysan sertıfıkatqa saı kelse jaryq úshin tólenetin aqy tórt esege deıin qysqarady. Ekologııalyq tazalyqqa da paıdasy zor. Búgingi kúni aýyl mektepteri áli kúnge deıin kómirmen jylytylyp otyrǵanyn bilemiz. Ár mekteptiń ekologııalyq shyǵyny jylyna 700 myń teńgege deıin jetedi. Al únemdeý sertıfıkaty bul shyǵyndardy qysqartýdy kózdeıdi», - deıdi atalǵan basqarmanyń tóraǵasy Saltanat Rahymbekova.
Onyń aıtýynsha, barlyq qonaq úılerden bastap saýda ortalyqtaryna deıin sertıfıkatqa ıe bolýyna jol ashyq. Osy arqyly kásipkerler nysandaryna energııa, sý jáne jylý baǵytynda qanshalyqty shyǵyn keltirilip jatqanyn, sonymen birge shyǵyndardy qysqartý úshin qandaı tehnologııalardy qoldanýǵa bolatynyn bile alady.
«Jasyl ekonomıka» jáne energııany únemdeý máseleleri boıynsha sarapshy Eldos Abaqanovtyń aıtýyna qaraǵanda, qozǵalmaıtyn múlik nysandaryn erikti sertıfıkattaý júıesi ótken jyldyń 70 jyldary álem elderinde qoldanyla bastaǵan.
«Álemdik tájirıbege súıensek, Ulybrıtanııa, AQSh, Germanııa elderinde jasyl standarttardy engizý tájirıbesi bar. Jalpy Reseıdegi «Ekologııalyq sertıfıkattaý ortalyǵymen» kelisimge kelip, kóktemde ǵana sertıfıkat berý quqyǵyna ıe bolyp otyrmyz», - deıdi ol.
Eldos Abaqanov óz sózinde sertıfıkatqa ıe bolý birneshe kezeńnen turatynyn atap ótti. Mamandar nysandardyń temperatýrasynan bastap, energııa, sý jáne jylý júıelerin tolyq tekseredi. Oǵan qosa radıatsııanyń mólsheri ólshenip, normalarǵa sáıkes keletini nemese kelmeıtini saralanady.
Búgingi tańda sertıfıkat «Arnasaı» jasyl tehnologııalar ortalyǵy men Prezıdent rezıdentsııasyna («Aqorda») tapsyrylǵan. Búgingi jıynda qola sertıfıkat «Jumbaqtas» qonaq úıine tabys etildi.
