Astanada qoqystardyń 75 paıyzy qaıta óńdeletin bolady
ASTANA. QazAqparat - Elordada turmystyq qaldyqtardyń 75 paıyzy qaıta óńdelýi yqtımal. Bul jaıly «Jasyl ósim» forýmynda Astana qalasy ákiminiń orynbasary Malıka Bekturova málim etti, dep habarlaıdy QazAqparat tilshisi.
«Qala halqynyń sany jylyna 50 myń adamǵa ósip keledi. Osydan 15 jyl buryn ǵana Astanada 200 myń adam turǵan bolatyn. Qazirgi shahar halqynyń sany - 1,2 mıllıon. Bul óte jaýapty mindetterdi júkteıdi. Ótken jyldan bastap biz seriktestermen memlekettik-jekeshelik seriktestikti nyǵaıtyp, qaıta óńdeıtin zaýyttardyń jumysyna basa nazar aýdara bastadyq. Olar bizdiń qalada qoqysty bólý men qaıta óńdeý boıynsha zaýyttardy da ashyp jatyr. Biz aldaǵy eki jylda qaladaǵy qoqystardyń 75 paıyzyn qaıta óńdeletindeı jumys júrgizemiz», - deıdi qala ákiminiń orynbasary.
Onyń aıtýynsha, qala basshylyǵy energııany saqtaı otyryp, qaldyqtardy azaıtýǵa baǵyttalǵan jobalardy júzege asyrmaq.
«Jasyl oblıgatsııalardy qoldaý arqyly qarastyryp, júzege asyrǵaly jatqan jobalardyń biri - Astanany jaryqtandyrýdyń «aqyldy júıesi», - deıdi Bekturova.
Onyń sózine sensek, 31 shildege deıin Astana shahary Malaızııa, Qytaı, Reseıden keletin jáne jergilikti kompanııalardan usynystardy qabyldaýǵa daıyn bolady.
«Bizde birshama jobalardyń tizimi daıyn», - dep túıdi Malıka Bekturova.
