Astanada qoqys jáshikteri jer astyna ornatyla bastady
ASTANA. QazAqparat - Elordada qoqys jáshikteri jer astyna ornatyla bastady. Mundaı jańashyldyqty Saryarqa aýdanynyń basshylyǵy engizip otyr, dep habarlaıdy QazAqparat «Habar 24» arnasyna silteme jasap.
Jańa jáshikter oryndy az alady. Qurylǵylar Fınlıandııa elinde shyǵarylǵan. Onyń árqaıysysy shamamen 1 mln teńge turady. Málim etilgendeı, ákimdik tarapynan qarjy bólingen joq. Búkil shyǵyndy dıstrıbıýtor kompanııa kótergen. Ázirge mundaı jáshikter tek eki turǵyn úıdiń mańynda ornatyldy. Eger bul pılottyq joba sátti júzege assa, Astananyń basqa ǵımarattarynyń janynda da zaman talabyna saı qoqys jınaıtyn konteınerler paıda bolady.
«Jer astyna qoqys konteınerlerin ornalastyryp jatyrmyz. Pılottyq joba boıynsha 2 mekenjaıǵa ornalastyryldy. Ol 4-5 ese az oryn alady. Dalada júrgen ıt-mysyq, jel saldarynan qoqys aýlany lastamaıdy. Neshe túrli ıister bolmaıdy», - deıdi Saryarqa aýdany ákiminiń orynbasary Rıshat Turdybekov.
