Astanada qoqys jáshigine túspeı qalǵan saǵyz úshin aıyppul salyp qana qoımaı, qamaýǵa alýy múmkin - respýblıkalyq basylymdarǵa sholý
***
Búgin Dúnıejúzilik ǵaryshkerler jáne avıatsııa kúni. Osy aıtýly dataǵa oraı «Egemen Qazaqstan» gazeti «Bolashaq - ǵaryshta» taqyrybymen basqan maqalasynda «Qazaqstan ǵarysh sapary» ulttyq kompanııasy» AQ prezıdenti Ǵabdýllatıf Myrzaqulovty áńgimege tartqan. Basylym tilshisiniń barlyq saýaldaryna egjeıli-tegjeıli jaýap bergen ol: «Ǵarysh salasynyń halyqqa beretini óte kóp. Birinshiden, Jerdi qashyqtyqtan zertteý júıesin alatyn bolsaq, bizdiń ǵarysh apparattarymyz aspanǵa ushqanda, biz Qazaqstannyń aýmaǵyn aı saıyn bir ret sýretke túsirip, qaı jerde qandaı kemshilik bar, qandaı apattardyń bolýy múmkin ekendigin anyqtaı alamyz. Osy qys óte qarly boldy. Shardara, Kóksaraı sý qoımalarynda, Almatynyń Jońǵar qaqpalarynda qalyń qar tústi. Bizdiń ǵarysh aspaptarymyz daıyn bolsa, biz der kezinde aqparat berip otyramyz. Halyqtyń tótenshe jaǵdaıdan aman bolýyna kómegin tıgizedi», - deıdi.
«Egemen Qazaqstan» gazetiniń jazýynsha, 24 sáýir men 1 mamyr aralyǵynda Ońtústik Koreıanyń Phenthek qalasynda aýyr atletıkadan Azııa chempıonaty ótedi. Bul synǵa Qazaqstan quramasynyń bapkerleri jas ziltemirshilerge úlken senim artyp otyr. Sebebi, negizgi quramdaǵy tolaǵaılar mamyr aıynda Taldyqorǵanda ótetin Qazaqstan chempıonatyna daıyndalý ústinde. Al el birinshiliginen soń, Olımpıada oıyndaryna kimniń baratyny túbegeıli belgili bolmaq. Maqala «Aýyr atletter Azııaǵa barady» degen taqyryppen berilgen.
***
«Memleket qoldaýymen qaıta qurylymdaýdy júıeli júzege asyrǵan Alıans Banki turaqty damý jolyna tústi. 2011 jyldyń qorytyndysy boıynsha bank aktıvteri 24 paıyzǵa, nesıe qorjyny 30 paıyzǵa artty. Depozıttik baza kólemi 41 paıyzǵa ósip, bank paıdasy 40 mıllıard teńgege jýyqtady», - dep jazady «Aıqyn» gazeti «Oryndalǵan ýáde tutynýshylar senimin oıatty» degen taqyryptaǵy maqalasynda. Basylymnyń atap ótýinshe, 2012 jyly Alıans Banki aktıvteri men mindettemeler ósimi 19 paıyzdy, depozıttik qorjyn ósimi - 20 paıyzdan asa kórsetkishti jáne nesıelik qorjyn ósimi - 17 paıyzdy quraıdy dep josparlap otyr.
Memleket basshysy bıylǵy Joldaýyn jarııalaǵan soń ile-shala ótken úkimettiń keńeıtilgen otyrysynda jeke turǵyn úı qurylysy (JTQ) úshin bólingen jer telimderin túgendeý jóninde tapsyrma berdi. Qazirgi kúnge deıin respýblıka boıynsha berilgen 350 myń jer teliminiń 315 myńy zerttelip, túgendeýden ótken. Sodan 27 myń jer teliminde tekserýler júrip jatyr eken. Solardyń qorytyndysy boıynsha 4689 jer teliminiń bastapqy aıqyndalǵanynan basqa maqsattarda nemese zańbuzýshylyqtarmen paıdalanylyp jatqandyǵy anyqtalǵan. Olar jóninde zańǵa sáıkes sharalar bastalyp, 595 jer teliminiń qujattary ıesiz múlik retinde esepke qoıýǵa jiberilse, 160 jer teliminiń materıaldary májbúrli túrde qaıtaryp alý úshin Jer resýrstaryn basqarý agenttiginiń aımaqtyq ınspektsııalaryna berilipti. Túıitkildi másele «Aıqyn» gazetindegi «Telmirtip qoıǵan telimder» degen taqyryptaǵy maqalada baıandalǵan.
***
Bas shahar - Astananyń mártebesi de, alar orny da erekshe. Ol solaı bolýy da kerek. Sondyqtan da Elbasy Nursultan Nazarbaev baǵanaly orda - basty ordany damytý máselesine únemi erekshe mán beredi. Keshegi elordanyń Táýelsizdik saraıynda ótken Astanany odan ári damytýǵa arnalǵan jıynnyń ózi buǵan aıǵaq. Bul jaıynda «Alash aınasy» gazetindegi "Bas qala - basqalarǵa úlgi bolýy tıis» degen taqyryptaǵy maqalada jazylǵan. «Ádettegideı Memleket basshysynyń ózi jetekshilik etken alqaly otyrysta qala ákimi baıandama jasap, Prezıdent bas shahardyń búginin bútindep, erteńin aıshyqtaýǵa baǵyttalǵan birqatar tapsyrmalardy belgiledi», - dep jazady basylym.
«Bolashaqtyqtardyń» jumysqa turýyn komıssııanyń ózi qadaǵalaýy kerek». Osy taqyryppen «Alash aınasy» gazetinde jaryq kórgen maqalada keshe Aqordada Memlekettik hatshy Muhtar Qul-Muhammed shetelde kadrlardy daıarlaý jónindegi respýblıkalyq komıssııanyń jańa quramymen bıylǵy jyldyń alǵashqy otyrysyn ótkizgendigi jaıynda jazylǵan. Otyrysta Bilim jáne ǵylym mınıstri B.Jumaǵulov 2011 jyly Prezıdenttiń «Bolashaq» halyqaralyq stıpendııasy baǵdarlamasyn iske asyrý barysy týraly esep jasady. Toqeteri, aǵymdaǵy jyly «Bolashaq» baǵdarlamasy boıynsha 1186 stıpendııa bólý josparlanyp otyr eken.
***
«Keshe Astanada Qazaqstan Respýblıkasynyń Syrtqy ister mınıstri Erjan Qazyhanov Latvııa Respýblıkasy Syrtqy ister mınıstrliginiń memlekettik hatshysy Andrıs Teıkmanısti qabyldady», - dep jazady «Kazahstanskaıa pravda» gazeti «O perspektıvah otnoshenıı» degen taqyryptaǵy maqalasynda. Basylymnyń atap ótýinshe, taraptar Qazaqstan-Latvııa yntymaqtastyǵynyń qazirgi jaǵdaıy men damý keleshegin qarastyrdy, halyqaralyq uıymdar sheńberindegi árekettestik boıynsha pikir almasty. Kezdesý barysynda E.Qazyhanov Astananyń syrtqy saıası bastamalaryna, atap aıtqanda, Qazaqstannyń 2010 jyly EQYU-daǵy tóraǵalyǵy, «Eýropaǵa jol» memlekettik baǵdarlamasynyń júzege asyrylýy jáne Ortalyq Azııadaǵy EO strategııasyna qatysty kórsetilgen qoldaý úshin A.Teıkmanıske alǵysyn bildirip, Latvııa Qazaqstan úshin Baltyq óńirindegi mańyzdy áriptes bolyp tabylatynyn atap kórsetti.
***
Astana qoqys jáshigine túspeı qalǵan saǵyz úshin azamatqa aıyppul salyp qana qomaı, ony qamaýǵa alatyn Qazaqstandaǵy alǵashqy qala bolýy múmkin. Bul týraly «Ekspress-K» gazeti «Prezıdent elordalyq sport nysandarynyń qoljetimsizdigine narazy» atty taqyryppen basqan maqalasynda jazdy.
Basylymda atap ótilgendeı, mundaı usynysty keshe Elbasy Nursultan Nazarbaev Astanany odan ári damytýǵa arnalǵan keńesti qorytyndylaı kele jasady. Prezıdenttiń pikirinshe, Astana budan ári de ekonomıka men qala sharýashylyǵyn tıimdi basqarýda, memlekettik qyzmet kórsetýde, ınvestıtsııalyq klımat pen halyqtyń ómir sapasyn arttyrýda ózgelerge úlgi bolyp qala berýi tıis. «Bul úshin barlyq múmkindikter men meniń jeke qoldaýym bar», - dep atap ótti Memleket basshysy.
