Astanada qoqys tasıtyn kólikter úıilgen qardan úı aýlalaryna kire almaı jatyr
NUR-SULTAN. QazAqparat – Nur-Sultanda qoqys tasıtyn kólikter qardyń qalyń túsýi sebepti konteınerlerge jete almaı jatyr, dep habarlaıdy QazAqparat tilshisi.
«Sýrette Astananyń sol jaǵalaýyndaǵy úılerdiń aýlasy. Báıterekke deıin jaıaý 15 mınýttyq jer!», - dep jazdy tanymal bloger Aıda Jeksen Facebook-tegi topta.
Jazbanyń astynda turǵyndar sol jaǵalaýdaǵy kóptegen aýlalarda qatty borannan qar úıilip, saldarynan qoqys tasıtyn tehnıkalar konteınerlerge bara almaı jatqanyn aıtýda. Elorda ákimdigi jaǵdaıdy túsindirdi.
«Aýa raıynyń kúrt nasharlaýyna baılanysty barlyq kommýnaldyq qyzmetteri, TJD, Polıtsııa, Ulttyq gvardııa qyzmetkerleri kúsheıtilgen rejimde jumys istep jatyr. Qazir kommýnaldyq qyzmet tarapynan eń mańyzdy jumys – adamdar men kólikterdiń júrýine ońaı bolý úshin magıstraldyq kóshelerdegi, trotýarlardaǵy qardy tazalaý. Sondaı-aq, áleýmettik nysandardaǵy – medıtsınalyq ortalyqtar, mektepter, balabaqshalardaǵy joldy qardan tazartý basty orynda tur. Keıin aýlalar men shaǵyn kósheler qamtylyp, sodan soń qoqys konteınerlerine alyp baratyn joldarǵa kóńil bólinedi», - dep habarlady Nur-Sultan qalasy ákiminiń baspasóz hatshysy Aqmaral Oljabaeva.
Avtor: Azamat Syzdyqbaev
Foto: Aıda Djeksen/facebook