Astanada kóktemgi sý tasqyndaryna qarsy jumystar bastaldy
ASTANA. 16 naýryz. QazAqparat /Gúlmıra Álıakparova/ - Astana qalasynda kóktemgi sý tasqyndarynyń aldyn alý maqsatyndaǵy jumystar bastaldy. Bul týraly ákimshilikten habarlady.
Astana ákimdigi janynda qalanyń ár aýdanynda tasqyn sýdy jiberýdi uıymdastyrý jónindegi vedomstvoaralyq komıssııalar quryldy, is-sharalar jospary bekitilip, olardy júzege asyrýǵa qalanyń barlyq kommýnaldyq qyzmetteri jumyldyryldy.
Búgingi kúni qala aýmaǵyn qardan tazartý jáne arnalardy ashý jumystarynyń basym denimen Astanadaǵy eń iri kommýnaldyq kásiporyn «Astana Tazalyq» JShS aınalysýda. Osy kúnge deıin kásiporyn qala aýmaǵynan 1 307 012 tekshe metr qar shyǵaryp úlgerdi.
«Bul jaman kórsetkish emes. Mysalǵa, 2009 jyly maýsym boıy 1 200 000 tekshe metr, al 2010 jyly 1 700 000 tekshe metr qar shyǵarylǵan bolatyn. Bıylǵy qysta qar kólemi ótken jylǵymen shamalas bolýy tıis dep kútilýde», - dedi «Astana Tazalyq» JShS-nyń dırektory Ermek Ospanov.
E.Ospanovtyń sózine qaraǵanda, qys boıy kásiporynnyń tehnıkalary táýlik boıy jumys istedi, balanstaǵy 317 tehnıka tolyq kólemde jumysqa tartylyp otyrdy. Sonymen qatar, bıyl kompanııa turǵyn úılerdiń aýlalaryna kirý esebinen jyl saıyn tazalaıtyn aýmaqty ulǵaıtýdy josparlap otyr (eger aýmaqqa tehnıkanyń kirý múmkindigi bolǵan jaǵdaıda). Sondaı-aq, JShS sý tasqynyna qarsy komıssııa quryp, óz brıgadasy ishinde táýlik boıǵy kúzetti uıymdastyrdy, tótenshe jaǵdaılar oryn alǵan jaǵdaıda habarlaý shemasyn daıyndady.
Kásiporyn qala aýmaǵynan qardy jınap, tysqa shyǵarýmen birge, sý burǵysh arnalar men naýalardy tazalaý jumystaryn júrgizýde. 15 naýryzdaǵy jaǵdaı boıynsha osyndaı 32 423 metr júıe tazartyldy. Jalpy uzyndyǵy 160 metr sý burǵysh qubyry býlandyrýdan ótti, kóshelerdegi jańbyr sýyn qabyldaıtyn 660 jer asty arnalary ashyldy. Búgingi tańda barlyq úsh tazalaý qurylǵysy men 18 sorǵy stansasy tekserildi. Olardyń barlyǵy jumys qalpynda. Ótken jyldardaǵy tasqyn men problemalar eskerilip, sý basqan jerlerge tóselý úshin 7 000 tekshe metr qıyrshyq tas pen qum salynǵan qaptar aldyn ala daıyndaldy.
Qala ákimdigi óziniń resmı saıtynda kóktem saıyn úıin sý basý problemasyna tap bolatyn azamattar úshin habarlasýǵa bolatyn baılanys telefondaryn ornatyp qoıdy.
