Astanada «Kóktemdegi Qytaı» jahandyq dıalogi ótti
ASTANA. KAZINFORM — «Kóktemdegi Qytaı: Qytaı múmkindikteri — álemmen bólisý» atty jahandyq dıalogi ótti.
Qytaı Medıa korporatsııasy (CMG), Qytaıdyń Qazaqstandaǵy Elshiligi jáne Astana halyqaralyq ýnıversıteti birlese ótkizgen konferentsııaǵa eki eldiń saıasat, bıznes, ǵylym men medıa salalarynan 60-tan astam ókili qatysty. Olar eki el arasyndaǵy yntymaqtastyqtyń qazirgi jaǵdaıyn saralap, onyń bolashaqtaǵy damý perspektıvalaryn talqylady.
Qytaıdyń Qazaqstandaǵy Tótenshe jáne Ókiletti Elshisi Han Chýnlın, Astana halyqaralyq ýnıversıtetiniń prezıdenti Serik Irsalıev jáne Májilis depýtaty Erkin Ábil is-sharanyń ashylýynda sóz sóıledi.
Elshi Han Chýnlın Qytaıdyń aeroǵarysh, jasandy ıntellekt jáne ózge de joǵary tehnologııalyq salalardaǵy qarqyndy damýyn atap ótti. Ol sondaı-aq Qytaıdyń reformalardy tereńdetý, joǵary deńgeıdegi ashyqtyq saıasatyn jalǵastyrý jáne «Adamzattyń birtutas taǵdyry qaýymdastyǵy» tujyrymdamasyn ustaný arqyly álemdik damýǵa jańa serpin beretinin aıtty.
Májilis depýtaty Erkin Ábil óz sózinde Qytaıdyń «eki sessııasynyń» tabysty ótýimen quttyqtap, sońǵy jyldary Qazaqstan men Qytaı arasyndaǵy strategııalyq seriktestiktiń nyǵaıǵanyn jáne eki el arasyndaǵy senim deńgeıiniń tarıhı joǵarylaı túskenin atap ótti. Sonymen qatar taraptar teńdik pen ózara tıimdilik qaǵıdattary negizinde yntymaqtastyqty odan ári damytýǵa jáne túrli saladaǵy ózara is-qımyldy keńeıtýge nıetti ekenin jetkizdi.
Konferentsııa barysynda qatysýshylar «Bir beldeý, bir jol» bastamasy, Qytaıdyń joǵary sapaly damýynyń jahandyq múmkindikteri jáne Qazaqstan-Qytaı joǵary tehnologııalyq yntymaqtastyǵy taqyryptary boıynsha tereń pikir almasty.
Eske sala keteıik, buǵan deıin Qytaı shetel kompanııalaryna telekommýnıkatsııalyq qyzmetterge synaq esebinde qol jetkizýge ruqsat bergenin jazǵan edik.