Astanada kóktem bastalǵaly 3,5 myń aǵash otyrǵyzyldy
ASTANA. QazAqparat - Elordada kún raıynyń jylynýymen kógaldandyrý maýsymy bastalady. Bul jumys sáýir aıynyń basynda bastaý alǵan ekologııalyq aılyq aıasynda júzege asyrylady. Osy ýaqyt ishinde qalanyń barlyq aýdanynda 3,5 myńnan astam aǵash pen buta otyrǵyzyldy. Bul rette japyraqty aǵash túrlerine basymdyq beriledi, dep habarlaıdy QazAqparat qalalyq ákimdiktiń resmı saıtyna silteme jasap.
Elordanyń saıabaqtarynda, gúlzarlarynda jáne basqa da ashyq alańdarynda jaz mezgiline daıyndyq qyzý júrip jatyr. Aǵashtar men butalardy sanıtarlyq kesý, ákteý jumysy júrgizilýde. Sondaı-aq, kommýnaldyq qyzmetter qalanyń sýburqaq keshenderin konservatsııalaý jumysyn júrgizedi.
8 sáýirden 6 mamyrǵa deıin elordada «Jasyl Astana» eko-aılyǵy ótkiziledi, onyń aıasynda birneshe senbilik josparlanyp otyr. Máselen eńbek ujymdarynyń, qala turǵyndarynyń, ShOB ókilderiniń kómegimen polıgonǵa 800 tonnadan astam qaldyq shyǵaryldy.
Jalpy aýdany 4 mln sharshy metr bolatyn saıabaqtar men skverlerdi jınaý júrgizildi. Ekologııalyq aılyqqa 15 myńǵa jýyq adam, 400-den astam kásiporyndar men uıymdar, PIK jáne MIB ujymdary, shaǵyn jáne orta bıznes sýbektileri jáne t.b. qatysty.
Osy senbide, 29 sáýirde Astanada jalpyqalalyq senbilik ótedi, onyń barysynda uıymdar men kásiporyndardyń ujymdary óz aýmaǵynda aǵash otyrǵyzady, qoqys jınaıdy, sondaı-aq sý aıdyndarynyń mańyn tazartady. 3 myńnan astam aǵash pen buta otyrǵyzý josparlanyp otyr.
2023 jyly bas-aıaǵy mıllıon jasyl jelek (butalar, aǵashtar, kóshetter jáne t.b.) otyrǵyzý josparlanypotyr. Onyń barysynda japyraqty aǵash túrlerine artyqshylyq beriledi.
