Astanada kóktaıǵaq saldarynan 100-den astam jol-kólik oqıǵasy bolǵan

ASTANA. KAZINFORM — Aýa raıynyń qolaısyzdyǵyna, atap aıtqanda qatty kóktaıǵaqqa baılanysty elordada barlyq baǵyttaǵy avtojolda qozǵalys ýaqytsha shekteldi. Bul týraly Astana qalalyq polıtsııa departamenti habarlady.

Vedomstvo málimetinshe, búgin qala aýmaǵynda 100-den astam jol-kólik oqıǵasy tirkelgen.

Osyǵan baılanysty polıtsııa júrgizýshilerdi asa qajettilik bolmasa, jolǵa shyqpaýǵa shaqyrady.

— Júrgizýshilerge jyldamdyq rejımin qatań saqtap, araqashyqtyqty ustaný, jolda barynsha muqııat ári saq bolý qajet. Sonymen qatar kommýnaldyq jáne jol qaýipsizdigin qamtamasyz etetin jedel qyzmetterdiń jumysyna kedergi keltirmeýlerińizdi suraımyz, — delingen habarlamada.

Sondaı-aq polıtsııa ata-analar men balalarǵa eskertý jasady. Kún jylyǵan kezde sý aıdyndaryndaǵy muzdyń qaýipti bolatyny atap ótildi.

— Ózender men ózge de sý aıdyndarynyń mańynda muzǵa shyǵýǵa jáne syrǵanaýǵa qatań tyıym salynady, — dep eskertti vedomstvo.

Uqsas jaǵdaı Óskemen qalasynda da baıqalady. Óskemende kún saıyn kóktaıǵaqtan 100-den astam adam zardap shegetinin jazǵan edik.