Astanada kókpardan I Ashyq Azııa chempıonaty ótedi
ASTANA. 7 qyrkúıek. QazAqparat - Qazirgi tańda ulttyq oıyndarymyzdy halyq arasynda keńinen nasıhattaý, salaýatty ómir saltyn qalyptastyrý jáne oıynnyń tehnıkasy men sheberligin ıgerýge jastarymyzdyń qyzyǵýshylyǵyn oıatý asa mańyzdy bolyp otyr. Osy oraıda QR Ulttyq sport túrleri qaýymdastyǵy elimizde respýblıkalyq, halyqaralyq jarystardy uıymdastyryp keledi. Qaýymdastyq bıylǵy jyly qyrkúıek aıynyń 10-15 aralyǵynda elimizde tuńǵysh ret Kókpardan I Ashyq Azııa chempıonatyn ótkizedi.
Bul týraly «Samuryq-Qazyna» AQ baspasóz qyzmetinen habarlady.
Kókpar oıyny túrik halyqtaryna ortaq bolǵandyqtan, ony birlesip damytý, halyqaralyq sport dárejesine jetkizý maqsatynda QR Ulttyq sport túrleri qaýymdastyǵy bıylǵy jyly qyrkúıektiń 10-15 aralyǵynda Kókpardan I-shi Ashyq Azııa chempıonatyn ótkizýdi óz qolyna aldy. Elimizde tuńǵysh ret ótkizilgeli otyrǵan chempıonatqa Azııanyń 8 memleketteri: Aýǵanstan, Qyrǵyzstan, Monǵolııa, Túrkııa, Qytaı, Reseı, Tájikstan, Ózbekstan elderi qatysyp, 4 kún boıy ózara baq synasady.
Qaýymdastyq uıymdastyryp otyrǵan chempıonattyń ashylý saltanaty úlken merekelik is-shara retinde uıymdastyrylyp, oǵan elimizdiń laýazymdy tulǵalary men zııaly qaýymy qatysady. Sonymen qatar, ulttyq salt-dástúrimizden kórinister uıymdastyrylyp, qazaqtyń sport sheberleri qatysatyn sherý uıymdastyrylady.
