Astanada kókónis saqtaý qoımalarynyń syıymdylyǵy tutynýdan 10 ese az - AShM
ASTANA. 28 qazan. QazAqparat /Jasulan Amanbaıuly/ - Astananyń ishki tutyný qajettilikterin toltyrý úshin shamamen 100 myń tonna kókónis ónimin saqtaýǵa alý kerek.
Bul týraly búgin elorda aınalasynda azyq-túlik beldeýin qurý aıasynda salynǵan «Astana Agro-AA» JShS-niń kókónis qoımasyna saparmen barǵan QR Aýyl sharýashylyǵy vıtse-mınıstri Múslim Ómirııaev málim etti.
Onyń aıtýynsha, Astanada qazirgi tańda jalpy syıymdylyǵy 10 myń tonna bolatyn 5 kókónis saqtaý qoımasy bar. Alaıda bul kólem elordanyń tutyný deńgeıinen áldeqaıda tómen bolyp otyr. Sonyń saldarynan Astanada qysqy-kóktemgi maýsymdarda kókónisterdiń baǵalary tym sharyqtap ketip otyrady.
«Esep málimetteri boıynsha, Astananyń ishki tutyný qajettilikterin toltyrý úshin shamamen 100 myń tonna ónimdi qysqy saqtaýǵa alý kerek», - deıdi M. Ómirııaev.
«Qazaqstan qazirgi ýaqytta óziniń ishki tutynýyna qajetti kókónis kólemin ósirip, óndirip jatyr. Biraq bar másele ony saqtaý kóleminiń azdyǵynda. Sondyqtan Aýyl sharýashylyǵy mınıstrligi «QazAgro» qarjylyq quraldary arqyly kókónis saqtaý kólemin ulǵaıtý boıynsha jumystar jasaýda», - dep atap kórsetti ol.
Vıtse-mınıstrdiń sózine qaraǵanda, Qazaqstanda sońǵy 3 jyl ishinde jalpy syıymdylyǵy 42 myń tonna bolatyn 10 kókónis saqtaý qoımasy salyndy. Jaqyn bolashaqta taǵy 8 qoıma paıdalanýǵa beriledi dep kútilýde. Jalpy «QazAgroQarjy» arqyly bul maqsattarǵa 94 mlrd. teńge bólý qarastyrylýda. Aýyl sharýashylyǵy mınıstrliginiń málimetteri boıynsha, elde 661,4 myń tonna ónim sııatyn 677 kókónis saqtaý qoımasy bar.
