Astanada qoqys pen qaldyqtardy shyǵarý tarıfi ósti
ASTANA. KAZINFORM – Elordada qatty turmystyq qaldyqtardy jınaýǵa, tasymaldaýǵa, suraptaýǵa jáne kómýge arnalǵan jańa tarıfter bekitildi.
Búgin elorda máslıhatynyń kezekten tys sessııasynda Astana qalasy Qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Dosqulov qazirgi tarıf keıingi 5 jyl boıy ózgermegenin aıtty.
- Qazirgi tarıf bir adamǵa aıyna 390 teńge somasynda eseptilip otyr. Onyń somasy 5 jyl boıy, ıaǵnı 2019 jyldan beri tarıf ózgerissiz boldy, al Almatyda qazirdiń ózinde 718 teńge. Ortasha eseppen 300 myń adam turatyn elimizdiń alty shaǵyn qalasynda tarıf 400-500 teńgege deıin ósti... Mindettemelerdi oryndaý úshin kompanııalar óz qarajattary esebinen quny 4,1 mlrd teńgege 100 jańa qoqys shyǵaratyn kólik pen 1 mlrd teńgege jýyq 15 myń jańa konteıner satyp aldy. Sondaı-aq qoqys tasymaldaıtyn kólikterdiń baǵyttaryn, konteınerlerdiń jaı-kúıin jáne olardyń toltyrylýyn onlaın baqylaýǵa múmkindik beretin arnaıy júıe engizildi. Osy sharalardyń nátıjesinde qalada oń dınamıka baıqalyp otyr, - dedi Dáýlet Dosqulov.
Onyń aıtýynsha, halyq sany 36 paıyzǵa ósken kezde, qaldyqtardy shyǵarý shyǵyndary 103 paıyzǵa ósken. Máselen, kásiporyndardyń naqty shyǵyndary 2019 jyly 260 mln teńge bolsa, 2024 jyly 544 mln teńgege jetken. Bul kórsetkishter qazirgi tarıfpen bızneske tıimsiz ekenin baıqatyp otyr. Tarıf kiristerden jáne kásiporyndardyń tabystylyǵy men shyǵystary negizinde qalyptasady.
- Buryn berilgen barlyq eskertýdi jáne usynystardy eskere otyryp, sondaı-aq turǵyndarǵa túsetin salmaqty azaıtý maqsatynda tarıfti abattandyrylǵan sektordyń bir turǵynyna 637 teńge jáne abattandyrylmaǵan aýmaqta 679 teńge mólsherinde bekitý usynylady, - dedi basqarma basshysy.
Elordada qoldanystaǵy tarıfter aıasynda halyqtyń áleýmettik osal toptaryna azamattardyń sanatyna qaraı 25 paıyzdan 100 paıyzǵa deıin jeńildikter qarastyrylǵan. Sonymen qatar, jeńildikter múgedektigi bar, jetim balalardy tárbılep otyrǵan otbasylarǵa, kópbalaly otbasylarǵa taralady.
Budan buryn habarlanǵandaı, búgin elorda máslıhatynyń kezekten tys sessııasynda Astanadaǵy beınebaqylaý júıesine jasandy ıntellektti engizýge qatysty sheshim qabyldandy.