Astanada qoǵamnyń aşy shyndyǵyn beınelegen «Únsizdik» perfomansy sahnalandy

ASTANA. KAZINFORM — Astanada Mýzykalyq jas kórermen teatrynda «Zań jáne tártip» qaǵıdaty aıasynda Jánibek Álikenniń «Únsizdik» atty perfomans baǵytyndaǵy qoıylymy qoıyldy. Osy perfomanstyń akteri Elaman Imanbaev qoıylymnyń qoǵamǵa aıtar oıy men maqsaty týraly aıtty. 

– Bul perfomans qoǵamdaǵy problemalardy únsizdikpen sheshe almaıtynymyzdy kórsetedi. Qoǵamnyń aşy shyndyǵy, spektakldegi keıipkerler shynaıy ómirde biz kóre tura mán bermeıtin adamdar bar ekenin kórsetedi. Men bul spektaklde «Dıvan batyryn» beıneleımin. Óziniń taıaz oıyn barsha oqyrmanyna jazyp otyratyn nadandaý blogerdi somdaımyn. Biraq onyń da aıtatyn aşy shyndyǵy bar. Osynyń bárin komedııalyq ázil-syqaqpen jetkizemiz. Jalpy spektakldiń úlken aıtar oıy bar, – dedi ol.

Akterdiń sózinshe, únsizdik degenimiz – dybystar estilmeıtin keńistik, adam sanasynyń túkpirine ornyqqan typ-tynysh uǵym bolsa da, qoıylymdaǵy «Únsizdik» túsinigi – kerisinshe, únsizdiktiń ar jaǵynda turǵan adam sanasyndaǵy kózqarastar men ustanymdar, ómirdiń shynaıy kelbeti, búgingi qoǵamnyń bet-beınesindegi ózgerister.

– Rýhanı qundylyqtar joǵalǵan kezde órkenıet qoǵamnan alystaıdy. Kez kelgen adamnyń jan-saraıynyń tórinde shyndyq pen adaldyq, ar men ádilet, móldirlik pen rýh tazalyǵy saltanat qurýy tıis. Jańa drama zańdylyqtary negizinde jazylyp, perfomans baǵytynda sahnalanǵan týyndyda sóz ben mýzyka úılesim taýyp, keıipkerler – tabıǵat pen adam, qoǵam men adam arasyndaǵy úndestikti izdeýge shaqyrady, – deıdi ol.

Aıta keteıik, kerekýlik qazaq teatry respýblıkalyq synshylar júldesine ıe boldy.