Astanada qoǵamdyq oryndyqtar syılyq retinde satyla bastady
ASTANA. QazAqparat - Elordadaǵy «Saryarqa» aýdanynyń ákimdigi erekshe aktsııany qolǵa aldy. Endi kez-kelgen adam óz atynan qaladaǵy kórikti jerlerge qoǵamdyq oryndyq syılaı alady, dep habarlaıdy QazAqparat qalalyq medıa ortalyqqa silteme jasap.
Búgin «Saryarqa» aýdany ákimdigi Ýrbanıstıka ortalyǵymen birlese otyryp «Astana tarıhynda óz esimindi qaldyr» atty qaıyrymdylyq marafonyn qolǵa aldy.
Endi elorda turǵyndary qalymyzdyń saıabaqtaryna, skverlerine jáne Esil jaǵalaýyna óz aty jazylǵan nemese otbasylyq ataýly kúnge arnalǵan eskertkish taqtaıshasy bar oryndyq syılaı alady.
Aktsııany uıymdastyrýshylardyń aıtýynsha, osylaısha Astana turǵyndary óziniń súıiktisine, otbasylyq ataýly kúnge, januıalyq merekelerge arnap osyndaı qoǵamǵa paıdaly syılyq jasaı alady.
Búgin «Saryarqa» aýdanynyń ákimdigi atalmysh aktsııany qoldaǵan azamattarǵa ataýly sertıfıkattar tabys etti.
«Joldasym ekeýmiz osy Esil jaǵalaýynda tanystyq. Ol oryndyqta telefonmen sóılesip otyrdy, men kelip janyna jaıǵastym. Súıtip ómirlik serigimdi osy Esil jaǵalaýyndaǵy oryndyqta jolyqtyrdym. Qazir eki kishkentaıymyz bar. Sol sebepti osy aktsııany qoldadym. Jáne basqada jastar týra osy bizdiń ataýly oryndyǵymyzda ómirlik serikterin jolyqtyrar degen nıette bar», - deıdi sertıfıkat ıesi Álibek Sısembın.
Qala kórkin buzbaý úshin oryndyqtar belgili bir standartqa saı jasalýy tıis. Eger osyndaı syılyq jasaýǵa nıettilerge Ýrbanıstıka ortalyǵynyń saıtynda oryndyqtardyń onǵa tarta úlgisi jáne baǵalary kórsetilgen.
