Astanada qoǵamdyq kólikte jurttyń qaltasyna túsken eki kúdikti ustaldy
ASTANA. QazAqparat - Astanada tártip saqshylary qoǵamdyq kólikte jurttyń qaltasyna túsken eki uryny ustady, dep habarlaıdy elorda ákimdiginiń resmı saıty.
Polıtsııa qyzmetkerleriniń aıtýynsha, ustalǵandar qalta urlyǵyn qoǵamdyq kólikterde júzege asyrǵan.
«Ustalǵandardyń bireýi №12 marshrýt salonynda tańǵy saǵat 08:00 men 08:20 saǵat aralyǵynda jolaýshy kúrteshesiniń qaltasynan uıaly telefon urlaǵan. Ekinshi ustalǵan er adam №17 avtobýs salonynda 30 myń teńgeni urlap ketken. Kúdiktiler ýaqytsha ustaý ızolıatoryna qamaldy», - delingen Astana qalasy polıtsııa departamentiniń baspasóz habarlamasynda.
Qazirgi tańda urlyq faktisi boıynsha sotqa deıingi tergeý amaldary júrgizilip jatyr. Ustalǵandardyń qala aýmaǵynda osyǵan uqsas basqa da qylmystarǵa qatystylyǵy tekserilýde.
"Eger ustalǵandardyń qylmystyq áreketterinen zardap shekken azamattar bolsa, Astana qalasynyń polıtsııa departamentine (Beıbitshilik, 19) nemese myna telefondar boıynsha: 8 (7172) 71-61-71; 71-62-47; 87021111441, «102» habarlasýdy suraımyz", - delingen habarlamada.
Sondaı-aq, polıtsııa qyzmetkerleri qoǵamdyq kólik jolaýshylaryna saq bolyp, baǵaly zattar men aqshany qoljetimdi jerlerde saqtamaýdy suraıdy.
