Astanada qoǵamdyq kólikte tegin júrgender jaýapkershilikke tartylady
Bul týraly "Astana LRT" kompanııasynyń basshysy Talǵat Ardan málim etti.
«Shilde aıynda kóliktik baqylaýdyń jańa standarty engiziledi. Óte jańa ádis. Zańnamada ózgertýler engizilgen bolatyn, endi qoǵamdyq kólikte tegin júrgeni úshin adamdar jaýapkershilikke tartylady. Ákimshilik polıtsııa qyzmetkerleri kóliktik baqylaý qyzmetkerlerimen birge ákimshilik aıyppul sala alady. Bunyń barlyǵy zańdyq turǵyda bekitildi. Shilde aıynda ol jumysty bastaımyz, eshkimge jasyryn emes, qazir kóptegen adamdar avtobýstarda tegin júrip júr. Bunyń barlyǵy tártipti kúsheıtýge baǵyttalyp otyr», - dedi ol.
Eske sala keteıik, aldaǵy jyldary Astana avtobýstary kondýktorsyz qyzmetke kóshýdi josparlaýda. Jolaqy arnaıy elektrondy júıeler arqyly alynady. Osy turǵyda bul qatań sharalar óte ózekti bolmaq. Sebebi, avtobýstarda elektrondy júıeni aldap ótkisi keletinderge shekteý qoıylady.
