Astanada qoǵamdyq kólik júrgizýshileri tapshy
ASTANA. QazAqparat - Astanada avtobýs júrgizýshileri jetispeıdi. Bul týraly Astana LRT Transport mamandarynyń biliktiligin arttyrý ortalyǵynyń dırektory Jeńis Jalbyr málim etti, dep habarlaıdy QazAqparat tilshisi.
«Avtobýs júrgizýshileri eńbek týraly zańǵa sáıkes jumys istemeıdi. Olar tıisti normadan artyq jumys istegendikten durys demalmaıdy. Bunyń barlyǵy avtobýs júrgizýshilerdiń jetispeýshiliginen. Búginde qaladaǵy 8 avtoparkte barlyǵy 1 678 júrgizýshi jumys isteıdi, bizge taǵy 790 avtobýs júrgizýshisi kerek. Eger avtoparkterge sýbsıdııa berilse, tapshylyq máselesi az da bolsa sheshiledi», - dedi J.Jalbyr qalalyq máslıhattyń otyrysynda.
Onyń aıtýynsha qoǵamdyq kólik júrgizýshileri negizgi mindetterinen bólek, avtobýsty jýý, janar maı quıý jáne jóndeý jumystaryn da qosa atqarady.
«Olar tańǵy 5-te jumysqa shyqqannan keshki 10-11-ge deıin toqtaýsyz júredi. Odan keıin, avtobýstyń janar maıyn quıyp, ony jýyp erteńge daıyndap qoıady. Úıine baramyn degenshe túngi 2-ge taıaıdy, sodan 2-3 saǵat uıqydan soń qaıta turýǵa týra keledi. Osydan da qalada qoǵamdyq kólikpen apatty jaǵdaılar jıi oryn alady. Biz osy turǵyda taldaý jumystaryn júrgizdik. Onyń nátıjesi boıynsha 72% júrgizýshiniń júıke júıesi adamdarmen jumys isteýge jáne olardy tasylmaýǵa sáıkes kelmeıdi. Talap boıynsha olar jol boıy 360 gradýsta jan-jaǵyn baqylaýda ustap otyrýy qajet», - dedi ol.
Astana LRT ókiliniń sózine sensek, qoǵamdyq kólik júrgizýshileri jetispeýshiliginiń taǵy bir sebebi - jalaqynyń az bolýy.
«Qazirgi kúni júrgizýshiler kondýktor qyzmetin qosa atqarady. Osy oraıda olardyń qyzmettik fýnktsııasyn qaıta qarap jalaqylaryn soǵan sáıkes esepteý kerek. Bizdegi júrgizýshilerdiń 80% óńirden kelgender, árıne olardyń basty problemasy baspana. Sondyqtanda bul jerde máseleni keshendi túrde sheshý kerek. Sondaı-aq, biz júrgizýshilerdiń qyzmettik ımıdjin kóterý maqsatynda olardyń zeınetkerlikke shyǵý jasyn tómendetýdi usynýdamyz», - deıdi ortalyq basshysy.
Atalǵan uıymnyń deregine súıensek, ótken jyly Astanada qoǵamdyq kólikte oryn alǵan jol apaty oqıǵasy 18 % tómendegen. Atap aıtqanda, 2018 jyly 1 632 jol-kólik oqıǵasy oryn alyp, onyń 566-na avtobýs júrgizýshileri kináli dep tanyldy.
