Astanada qoǵamdyq kólik qyzmetiniń sapasy artady
ASTANA. 14 qańtar. QazAqparat - Halqynyń sany 800 myńnan asqan Astanada 700 myńǵa jýyq turǵyn qoǵamdyq kólikpen júredi. Qalada ázirge 8 avtopark 941 avtobýs bar. Bıyl qosymsha taǵy 350 jańa avtobýs satyp alý kózdelgen. Al tozyǵy jetken avtobýstar tolyqtaı qoldanystan shyǵarylmaq, dep habarlady elordanyń resmı saıtynan.
«Qalada tańerteńgi ári keshki ýaqytta avtobýstar kóshedegi kólik keptelisiniń saldarynan kesteden keshigedi. Onyń ústine az-kem avtobýs jetispeýshiligi bar. Sondyqtan kedergilerge tap bolamyz. Bul máseleni sheshýde birqatar jumys atqarylýda. Jańa avtobýstardyń alǵashqy toptamasy birinshi jartyjyldyqta kelýi kerek. Sonda másele edáýir jeńildeıdi dep oılaımyn», - dedi Astana qalasy Jolaýshylar tasymaly jáne avtomobıl joldary basqarmasy bóliminiń basshysy Ábdihamıt Tamabaev.
Jańa avtobýstarda jol aqysyn qolma-qol emes, elektrondy túrle tóleý qarastyrylýda. Bul jol aqysyna áser etpeıdi. Sondaı-aq, gazben júretin bul kólikterde múgedekter múmkindigi de eskerilip, olardyń avtobýspen qatynaýyna jaǵdaı jasalǵan.
Qandaı iri qala bolmasyn, kólik keptelisin aınalyp ótken emes. Halyq sany artyp, jeńil kólikter kóbeıgen saıyn Astana kósheleri de tarlyq etýde. Bul máseleni sheshýde aınalma joldar salynyp, kóshe qıylystary keńeıtilip jatyr. Al jyldamdyqty asyryp, qoǵamdyq tártipti buzǵan júrgizýshilermen qatań kúres júrgiziledi.
