Astanada qoǵamdyq kólik áıeldi qaǵyp ketti
ASTANA. QazAqparat - Búgin tańerteń Astanada jolaýshylar avtobýsy áıeldi qaǵyp ketti. Aýrýhanaǵa jetkizilgen zardap shegýshiniń jaǵdaıy qazir turaqty ekeni belgili bolyp otyr, dep habarlaıdy QazAqparat tilshisi «Astana LRT» kompanııasynyń baspasóz qyzmetine silteme jasap.
Aıta ketsek, qoǵamdyq kólik qaqqan áıel týraly kýágerler áleýmettik jelide jazǵan bolatyn.
«Astana LRT» kompanııasy jol-kólik apaty týraly mán-jaıdy aıtyp berdi. Kompanııa keltirgen aqparatqa sáıkes, oqıǵa búgin saǵat 07:30 shamasynda bolǵan. Saǵatyna 32 shaqyrym jyldamdyqpen Gete kóshesinde kele jatqan №37 avtobýs joldyń ruqsat etilmegen tusynan ótpek bolǵan áıeldi qaǵyp ketken.
«Aıta keterligi, jaıaý júrginshiler jolaǵy 30-40 metr jerde bolǵan. Áıel birden aýrýhanaǵa jetkizildi. Qazir onyń jaǵdaıy turaqty. Oqıǵa ornyna jetken polıtsııa qyzmetkerleri mán-jaıdy anyqtady», - delingen habarlamada.
Belgili bolǵandaı, avtobýs júrgizýshisi kompanııada eńbek etkenine 10 jyldan asqan. Avtopark tarapynan onyń jumysyna eshqandaı eskertýler jasalmaǵan. Júrgizýshi ádettegideı, tańerteń medıtsınalyq tekseristen ótip, reıske jiberilgen.
«Tergeý amaldary aıaqtalǵansha júrgizýshi jumystan shettetildi», - dep habarlandy Astana LRT» kompanııasynan.
