Astanada qoǵamdyq tártipti buzǵan sheteldik 15 táýlikke qamaldy
ASTANA. KAZINFORM — Elordanyń Botanıkalyq baǵynda sanıtarlyq talaptardy óreskel buzǵan 38 jastaǵy sheteldik ákimshilik qamaýǵa alyndy, dep habarlaıdy Astana ákimdiginiń resmı saıty.
Shetel azamaty baq aýmaǵyndaǵy kógaldyń ústinde dáret syndyryp, qoǵamdyq tártipti óreskel buzyp, ózgelerge qurmetsizdik tanytqan.
Oqıǵa ornyna jedel jetken polıtsııa qyzmetkerleri zańsyz áreketti toqtatyp, quqyq buzýshyǵa qatysty ákimshilik hattama toltyrdy. Sot usaq buzaqylyq jasaǵany úshin er adamdy 15 táýlikke ákimshilik qamaýǵa alý týraly sheshim shyǵardy.
Polıtsııa qoǵamdyq oryndar azamattardyń tynyǵyp, demalýyna arnalǵanyn, mundaı áreketterge jol berilmeıtinin eske salady.
— Qoǵamdyq tártip pen qoǵamdyq moral normalaryn buzatyn kez kelgen áreket zań aıasynda tıisti baǵasyn alady. «Zań men tártip» qaǵıdatyn qamtamasyz etý ishki ister organdary jumysynyń basym baǵyttarynyń biri bolyp qala beredi. Qoǵamdyq tártipti buzýdyń árbir jaǵdaıy der kezinde toqtatylyp, zań aıasynda shara qoldanylady. Jazanyń bultartpastyǵy — quqyq buzýshylyqtyń aldyn alý men azamattardyń qaýipsizdigin qamtamasyz etýdiń negizgi qaǵıdattarynyń biri, — delingen aqparatta.
Eske sala keteıik, Almatyda qoǵamdyq orynda balaǵattaǵan sheteldik 10 kúnge qamaldy.
