Astanada qoǵamdyq tamaqtaný oryndarynyń órt qaýipsizdigi tekserildi
ASTANA. KAZINFORM — Elordada dámhanalar men meıramhanalarǵa órt qaýipsizdigi boıynsha reıd júrgizildi, dep habarlaıdy qala ákimdiginiń resmı saıty.
Elordada Nura aýdany ákiminiń apparaty aýdandyq Tótenshe jaǵdaılar basqarmasy jáne Astana qalasynyń Turǵyn úı basqarmasymen birlesip, qoǵamdyq tamaqtaný nysandarynda órt qaýipsizdigi talaptarynyń saqtalýyna qatysty reıdtik is-shara ótkizdi.
Reıd barysynda kásipkerler men nysan qyzmetkerlerine elektr jelileri men elektr jabdyqtaryn qaýipsiz paıdalaný, gaz ballondaryn qoldaný talaptary, mangaldardy qaýipsiz paıdalaný erejeleri túsindirildi.
Sondaı-aq nysandarda jaramdy órt sóndirý quraldarynyń bolýy men órt dabyly júıesiniń jumysqa qabilettiligine erekshe nazar aýdaryldy.
— Eki qabattan joǵary turǵyn úı keshenderinde gaz ballondaryn paıdalanýǵa jol berilmeıdi. Sondyqtan qoǵamdyq tamaqtaný oryndary ashanalarynda gaz ballondaryn qoldaný kezinde qaýipsizdik talaptaryn qatań saqtaý qajet. Biz kásipkerlerge turaqty túrde túsindirý júrgizip, órttiń aldyn alý sharalaryn kúsheıtip kelemiz, — dedi Nura aýdany Tótenshe jaǵdaılar basqarmasy bastyǵynyń orynbasary Abaı Qabykenov.
Buǵan deıin Astanada zańsyz alkogol saýdasyna qarsy baqylaý kúsheıtilgeni belgili boldy.
